د افغان حکومت بهر اوسیدونکی مخالفان کوم جدي ګواښ نه دی
د افغانستان په چارو کې د پاکستان پخواني استازي اعلان کړی چې اوس مهال د افغانستان د طالبانو حکومت په پياوړي موقعيت کې دی او له افغانستانه بهر مخالفين ئې د دغې ډلې لپاره جدي ګواښ نه شمیرل کېږي.
د تسنيم خبري اژانس د راپور له مخې، د افغانستان په چارو کې د پاکستان پخواني استازي آصف علي دراني ويلي چې طالبان اوس مهال پیاوړي دي او بهرني مخالفين ئې د دغې ډلې لپاره خطره نه شي جوړولی.
هغه د اسلاماباد د خپګان د زياتوالي په اړه، چې د تحريک طالبان پاکستان (TTP) ته د پناه ورکولو له امله رامینځته شوی، وويل:له دغو اختلافاتو سره سره، د افغانستان د طالبانو د حکومت بهرني مخالفين اغېزمن نه دي او ګواښ نه شمېرل کېږي.
آصف دراني د طالبانو په وړاندې د پاکستان د پاليسۍ د بدلون د امکان په اړه وويل،دا ارزونه سمه نه ده چې اسلاماباد د افغان طالبانو له مخالفانو سره د تعامل په لور روان دی. افغانان بايد خپل برخليک پخپله وټاکي او په دې برخه کې هر ډول بهرنی مداخلت به ناسمه وي.
د افغانستان په چارو کې د پاکستان پخواني استازي د طالبانو د مخالفينو د احتمالي غونډې په اړه، چې په اسلاماباد کې ترسره کېږي، وويل؛ دا غونډه علمي بڼه لري او پاکستان د افغانانو د سياسي او علمي فعاليتونو ترمینځ توپير کوي.
افغان رسنيو راپور ورکړی چې آصف دراني د طالبانو او هند د اړيکو په اړه ويلي: دا ډله د هند له مالي سرچينو ګټه اخلي او دا ئې د تحريک طالبان پاکستان،یا ټي ټي پی په څیر د هند نبابتیانو ته منتقلوي.
دراني خبرداری ورکړی که بهرني ځواکونه له طالبانو څخه استفاده وکړي، په افغانستان کې د کابل د اوسني حکومت دوام به تر پوښتنې لاندې راشي.
افغان رسنيو دا هم راپور کړی چې د افغانستان په چاروکې د پاکستان د پخواني استازي په باور، د طالبانو د حکومت داخلي انسجام او نظم لا هم پايدار دی.
په تېرو مياشتو کې د پاکستانيو چارواکو او د طالبانو د بهرنيو مخالفانو د ليدنو په اړه راپورونه خپاره شوي، خو اسلاماباد تر اوسه په افغانستان کې د سياسي بدیل جوړولو هڅې رد کړي دي.
