برادر: د افغانستان دښمنان دې نور زموږ حوصلې نه ازمايي
د طالبانو د ریاست الوزرا اقتصادي مرستیال ملا عبدالغني برادر ویلي، افغانان هېچاته اجازه نه ورکوي چې پر خاوره یې تېری وکړي او هر تېري ته به ځواب ورکړي. برادر دغه خبرې د ملي دفاع وزارت ځانګړو کمانډویي ځواکونو د شپږمې دورې فراغت غونډه کې کړې دي.
نوموړي د طالبانو متقابلو اړیکو ژمنتیا ته په اشارې سره خبر داری ورکړی چې د هېواد دښمنانو باندې غږ کوي چې افغان خاورې او حریم ته په بد نظر ونه ګوري او نور دې زموږ حوصلې نه ازمایي.
نوموړي همدارنګه ټینګار کړی چې طالبان د ملي ګټو په چوکاټ کې ټولو هېوادونو سره متقابلو اړیکو ته ژمن دي.
له دې سره د طالبانو د بهرنیو چارو وزیر هم وایي، هیله لري اسلام اباد د زور په ځای خبرو ته ترجیح ورکړي.
امیرخان متقي دا خبره پرون په کابل کې د بهرنیو چارو په وزارت کې د ناروې له شارژدافیر پیر البرت الساس سره د لیدو پرمهال وکړه.
د طالبانو د بهرنیو چارو وزارت په بیان کې راغلې چې د دې لیدنې پرمهال دواړو لورو د افغانستان پر سیاسي، اقتصادي او بشري موضوعاتو خبرې وکړې او د افغانستان-پاکستان او سیمې پر وضعیت هم وغږیدل.
د دې بیان له مخې د ناروې شارژدافیر د افغانستان په ختیځ کې د وروستیو بمباریو په ترڅ کې د ملکیانو پر وژنه خواشیني څرګنده کړه.
طالبان وایي، د دوشنبې په شپه ناوخته پاکستاني الوتکو په خوست، پکتیکا او کونړ ولایتونو کې بمبارۍ وکړې چې لږ تر لږه لس ملکیان پکې ووژل شول. پاکستان ویلي دي چې د دوی الوتکو دا بمباري نه ده کړې.
