قطر له افغانستان سره د نړیوالو مرستو د زیاتېدو غوښتنه وکړه

د قطر د دولت د نړیوالو همکاریو وزیرې مریم بنت علي بن ناصر المسند د یوناما له مرستیال انډریکا رټواټه سره لیدلي او د افغانستان د بشري او پراختیايي وضعیت په اړه یې ورسره خبرې کړې دي.

په دې کتنه کې د ملګرو ملتونو او دوحې ترمنځ د همکاریو د پیاوړتیا، په ځانګړي ډول د افغانستان د ملاتړ پر لارو چارو بحث شوی.

المسند ډاډ ورکړی چې قطر به د افغانستان په اړه د سیاسي، بشري او لوجسټیکي همکارۍ په برخه کې له یوناما سره خپل ملاتړ ته دوام ورکړي او کابل کې د یوناما د ماموریت د اسانتیا لپاره به هڅې وکړي.

نوموړې د افغانانو د ملاتړ پر دوام ټینګار کړی او د روغتیا، پوهنې او اقتصادي پراختیا په برخو کې یې د نړیوالو مرستو د زیاتېدو غوښتنه کړې ده.