د هلمند ولایت ۶۰ سلنه ماشومان له زده کړو بې برخې دي
د رسنیو په حواله، د هلمند ولایت ځايي چارواکي وايي، د ښوونځیو ودانیو او مسلکي ښوونکو د کمښت له امله، د دغه ولایت ښوونځي ته د تلو په شرایطو برابر شاوخوا ۶۰ سلنه ماشومان له زدهکړو بېبرخې دي.
چارواکو زیاته کړې چې د هلمند په ځینو ولسوالیو کې حتی یو ښوونځی هم نه شته.
د هلمند د پوهنې رئیس، مولوي عبدالله زاکر ویلي چې دا مهال په هلمند کې ۳۵۷ ښوونځي فعال دي او تر ۱۸۳ زره ډېر زدهکوونکي پکې زدهکړې کوي.
د نوموړي په وینا، په ځینو ولسوالیو کې ښوونځي د ودانیو، درسي تجهیزاتو او ښوونکو له کمښت سره مخامخ دي او په یو شمېر سیمو کې هېڅ ښوونځی نشته.
د هغه په خبره، په بهرامچه، بغني او بغران ولسوالیو کې تر ټولو ډېر ماشومان له زدهکړو محروم دي. دا هغه ولسوالۍ دي چې د جمهوریت په مهال یې کنټرول د طالبانو په لاس کې وو.
همداراز، نهرسراج، ګرمسیر، خانشین، دېشو، بهرامچه، بغني او بغران هغه ولسوالۍ دي چې ښوونځیو ته جدي اړتیا لري، او ځايي چارواکو یې غوښتنې د پوهنې له وزارت سره شریکې کړې دي.
چارواکي وايي، د یادو ولسوالیو اوسېدونکي نه یوازې ښوونځیو او ښوونکو ته اړتیا لري، بلکې د درسي کتابونو کمښت هم لویه ستونزه ده.
تر دې وړاندې د روزګان چارواکو هم ویلي وو چې په دغه ولایت کې د ښوونځي د عمر ۸۴ سلنه ماشومان له زدهکړو محروم دي.
