سرپل ولایت کښې هم د نوروز په مېلو بندیز ولګیده

د افغانستان په سرپل ولایت کې په وزلوبې، غېږې نیونې، سنتي لوبو او د نوروز په مېلو بندیز ولګول شو.

د سرپل سیمه‌ییز چارواکي وايي، دا اقدام‌یې د کرونا وایرس د خپرېدو د مخنیوي په هدف کړی دی.

د سرپل والي عبدالقادر اشنا نن وویل چې د دولتي بنسټونو له مسؤلینو، دیني عالمانو، سپین ږیرو او مدني فعالانو سره په دې اړه هوکړې ته رسېدلی چې خلک به په غونډو کې له ګډونه ډده کوي.

په سرپل ولایت کې هر کال د نوروز په ورځ د امام یحیی بن زید جنډه په ځانګړو مراسمو سره پورته کېږي.

دا په داسې حال کښې دي چې له نیکه مرغه په سرپل ولایت کې تر اوسه د کرونا وایرس هېڅ مثبته پېښه نه‌ده ثبت شوې.