د کورونا ویروس له امله په کابل کې ګرځبندیز
کورنیو چارو وزارت په کابل ښار کښې له نن ( پنجشنبه غوي ۴ ) څخه د کورونا ویروس له امله د ګرځبندیز د جدي پلې کېدو خبر ورکړی دی.
که څه هم کابل او یو شمېر نورو ولایتونو کې چې د کرونا ویروس ګواښ ډېر دی، له تېرې یوې میاشتې راهیسې د خلکو په ګرځېدا محدودیتونه لګول شوي دي، چې له ډلې یې کابل کې ټولې دولتي ملکي ادارې بندې او ښار کې د خلکو تګ راتګ پیکه شوی دی.
د عامې روغیتا وزارت او امنیتي بنسټونو کابل میشتو څخه په کلکه غواړي چې په خپل کورونو کې پاټې شي، تر څو د کرونا ویروس د خپرېدو مخنیوی شوی وي.
کورنیو چارو وزارت په داسې حال کې یو ځل بیا د ګرځبندیز پر جدي پلې کېدو ټینګار کړی، چې په وروستیو څو ورځو کې د کابل په ښار کې بیا د خلکو ګڼه ګونه ډېره شوې، او دغه راز د کرونا ویروس د مثبتو پېښو شمېر هم لوړ شوی دی.
اوس مهال کابل تر هر بل ولایت ډېرې د کرونا ویروس مثبتې پېښې لري، او د هرې ورځې په تېرېدو دغو پېښو کې ډېروالی راځي، خو یو شمېر خلک له بدې ورځې اړ دي چې د قرنطین په ورځو کې هم بهر ووځي.
کابل، هغه ولایت کې لویه برخه اوسېدونکي یې له فقر سره لاس او ګرېوان دي، او دېری یې د ورځې پیدا شپې ته خوري، او له همدې امله د کرنا ویروس له امله د محدودیتونه له امله سختي شپې او ورځې تېروي.
افغان حکومت د قرنطین پر مهال بې وزلو کورنیو سره د مرستې ټټر وهلی، خو لا یې هم دې ژمنې عملي بڼه نه ده خپله کړې، او له همدې امله کابل کې په ټوله معنا د کرځبندیز پلې کول ناشونی کار دی.
