په ننګرهار کې طالبانو دوه پلونه په بمونو الوزولي
ځايي خلک وایي، طالبانو پلچکونه په دې موخه په بمونو الوزولي څو یادې پوستې ته مرستندویه ځواکونه ونه رسېږي.
د ننګرهار ولایتي چارواکي وایي، چې وسله والو طالبانو د سره رود ولسوالۍ اړوند فتح اباد سيمه کې دوه پلچکونه په بمونو الوزولی دي.
دوی وایي، د دې پلچکونو له ړنګېدو وروسته لاره بنده ده او خلک له ګڼو ستونزو سره مخ دي.
بل لورته د ځايي خلکو په خبره په همدې سیمه کې تېره شپه وسله والو طالبانو د افغان ځواکونو پر یوه پوسته وسله وال برید هم کړی وو.
د دوی په وینا پر یاده پوسته د افغان ځواکونو او طالبانو ترمنځ ۳ ساعته سخته جګړه وشوه، خو طالبان د پوستې په نیولو بریالي نه شول.
ځايي خلک وایي، طالبانو پلچکونه په دې موخه په بمونو الوزولي څو یادې پوستې ته مرستندویه ځواکونه ونه رسېږي.
د.ځایي خلکو په خبره د هاوان ۴ مرمۍ د ملکي خلکو پر کورونو هم لګیدلي خو ځاني زیان نه لري.
په ورته وخت کې یوې امنیتي سرچینې وویل، په دې نښته کې دواړو لوریو ته مرګ ژوبله اوښتې .
وسله والو طالبانو بیا تر اوسه په دې اړه څه نه دي ویلي.
