د جرمني په یوه ښار کې د چاقو په برید کې څو تنه وژل شوي

د جرمني پولیس وايي، په سولینګن ښار کې د چاقو په برید کې څو تنو ته مرګ ژوبله اوښتې ده.

د بیلډ ورځپاڼه وایی، په دې پېښه کې چې د جمعې په ماښام د ښار په مرکز کې د یوې مېلې په لړ کې وشوه لږ تر لږه درې کسان وژل شوي او یو شمېر نور ټپیان شوي دي.

د ورځپاڼې په وینا، برید په ځايي وخت له مخې د شپې په ۲۱:۴۵ بجو شوی دی.

داسې انګیرل کیږي چې برید کوونکی له پیښې څخه تښتیدلی او د پولیسو له خوا تعقیب کیږي. د پولیسو هلیکوپترونه پر ښار راګرځي.

دغه برید د ښار د ۶۵۰مې کلیزې د لمانځلو په مراسمو کې شوی دی.

د ښار چارواکو له خلکو وغوښتل چې د مېلې له ځایه  ووځي، او پولیس امنیتي کټارې جوړوي.

د راپورونو له مخې، بیړنی عمله په پیښه کې د ټپیانو درملنه کوي.

ټاکل شوې وه چې فیستوال په دغه ښار کې د یکشنبې تر ورځې پورې دوام وکړي.