ایران د افغانستان سرحدي لاره بشپړوي

په کابل کې د ایران سفیر ویلي چې په ۱۴۰۴ کال کې به د فراه او ماهیرود ترمنځ مهم سرحدي سړک جوړ شي.

زمونږ خبریال راپور راکوی په کابل کې د ایران سفارت سرپرست علیرضا بیکدلی، «د ۱۴۰۴ کال په جریان کې د ایران او افغانستان په سرحد کې د فراه-ماهیرود سړک د بشپړېدو خبر ورکړ.»

د فراه-ماهیرود سړک، چې د ایران او افغانستان په سرحد کې موقعیت لري، یوه  ستراتیژیکه  پروژه ده چې د سیمه‌ییزو ترانسپورټي زیربناوو د پراختیا د یوې برخې په توګه پرمخ ځي. دا سړک، چې د ورېښمو د تاریخي لارې یوه برخه وه، په تېر کې یې په سوداګرۍ او کلتوري تبادلې کې مهم رول لوبولی دی.

په کابل کې د ایران سفارت په وینا، د دې لیدنې په جریان کې چې د ایران د اقتصادي پلاوي په شتون  کې ترسره شوه، اعلان وشو چې په  خراسان جنوبي ولایت کې  به د دې لارې په بشپړېدو سره، د ختیځ-لویدیځ ترانزیټي لارې ظرفیت لوړ شي او د افغانستان له ایران او نورو هېوادونو سره اړیکه به د دې لارې له لارې اسانه شي.

د خراسان جنوبي د سړک او ښار جوړونې رئیس هم اعلان کړی چې له ماهیرود سرحدي پایې څخه د فراه ولایت پورې ۵۳ کیلومتره لاره په  ۸۳ سلنه فزیکي پرمختګ سره تر کار لاندې ده.