د اریانا افغان هوايي شرکت مشهد ته هم الوتنې پیلوي

د اریانا افغان هوايي شرکت الوتنې د مې په شپږمه، چې د ثور له ۱۶ سره برابرېږي پیل شي او له یادې نېټې وروسته به په اوونۍ کې ۳ الوتنې کوي.

له مسکو وروسته د اریانا افغان هوايي شرکت د ایران مشهد ته هم الوتنې پیلوي.

د طالبانو تر واک لاندې د افغانستان د ترانسپورت او هوايي چلن وزارت نن وویل چې «د اریانا افغان هوايي شرکت» به ژر د ایران مشهد ښار ته الوتنې پیل کړي.

د ترانسپورت او هوايي چلن وزارت د خبرپاڼې له مخې، مشهد ته به له اوږده ځنډه وروسته د اریانا افغان هوايي شرکت الوتنې د مې په شپږمه، چې د ثور له ۱۶ سره برابرېږي پیل شي او له یادې نېټې وروسته به په اوونۍ کې ۳ الوتنې کوي.

په خبرپاڼه کې وړاندې راغلي چې مشهد ته به د اریانا افغان هوايي شرکت الوتکې د یکشنبو، سې شنبو او جمعو په ورځو الوتنې کوي.