داعش د ایران او افغانستان ګډ دښمن دی
د افغانستان د سرپرست حکومت د رئیس الوزار سیاسي مرستیال په دغه هېواد کې د ایران د ولسمشر له ځانګړي استازي او سفیر سره په لیدنه کې ویلي چې داعش د ایران او افغانستان ګډ دښمن دی.
د ریاست الوزرا د سیاسي مرستیال د دفتر په اعلامیه کې ویل شوي چې مولوي کبیر په ایران کې د وروستیو بریدونو او خلکو ته د مرګ ژوبلې د اوښتو په باب ایراني لوري ته تسیلت ویلی او داعش یې د یوه مشترک دښمن په توګه یاد کړی، چې د سیمې د ناامنه کولو او د بې ګناه خلکو د وژلو هدف لري.
په دې لیدنه کې همدا راز د حسن کاظمي قمي له قوله ویل شوي چې ایران ګواکې د طالبانو د مخالفو ډلو ملاتړ نه کوي او د ده په خبره، هغه ډلې چې د ایران او افغانستان تر منځ مخالفتونه رامنځته کوي بریالۍ کېدای نه شي.
د طالبانو د حکومت د اعلامیې په اساس، په دې لیدنه کې چې یکشنبه ناوخته په کابل کې شوې په ګډې سوداګرۍ او د ټرانزیټ لپاره د لا زیاتو اسانتیاوو په رامنځته کولو هم خبرې شوي دي.
