په اټومي خبرو کې د ایران له مشروع حقونو د روسیې ملاتړ
پارس ټوډې – د روسیې د بهرنیو چارو وزیر له خپل ایراني سیال سره په ټلفوني اړیکه کې د ایران د مشروع حقونو پر ملاتړ ټینګار وکړ.
د پارس ټوډې د راپور له مخې، د روسیې د بهرنیو چارو وزیر سرګي لاوروف د جمعې په ورځ د ایران د اسلامي جمهوریت د بهرنیو چارو له وزیر سید عباس عراقچي سره په ټلفوني اړیکه کې، پر دې ټینګار وکړ چې مسکو د هغو سیاسي او ډیپلوماتیکو عادلانه حل لارو د ترلاسه کولو ملاتړ کوي چې د ایران مشروع حقونو ته درناوی وکړي.
په دې خبرو اترو کې دواړو لورو د ایران د اټومي موضوع اوسني وضعیت په اړه، په ځانګړي ډول د ایران او امریکا ترمنځ په جنیوا کې د غیر مستقیمو مذاکراتو پایلو په پام کې نیولو سره، نظرونه شریک کړل.
د روسیې د بهرنیو چارو وزارت د اعلان له مخې، روسي لوري یو ځل بیا د مذاکراتو د بهیر ملاتړ اعلان کړ چې د اټومي وسلو د نه خپرېدو تړون (NPT) په چوکاټ کې ترسره کېږي او په ټینګار سره یې ویلي چې باید داسې حل لارې وموندل شي چې د ایران مشروع حقونه تضمین کړي.
په دې ټلفوني اړیکه کې د اټومي موضوع تر څنګ، د دواړو هېوادونو ترمنځ په دوهاړخیزو اړیکو کې ځینې نورې متقابلې د خوښې وړ موضوعګانې هم وڅېړل شوې.
دا مشورې د تهران او مسکو ترمنځ د دوامداره او ګڼو اړیکو په لړ کې ترسره کېږي؛ په ځانګړي ډول د دواړو هېوادونو د اقتصادي همکاریو د ګډ کمېسیون د نهمې ناستې وروسته چې په تهران کې جوړه شوه او په پایله کې یې د همکارۍ یو سند او څلور تفاهم لیکونه لاسلیک شول.
