د ایران دفاعي توان د هیڅ نړیوال قانون خلاف نه دی
د ایران د اسلامي جمهوریت د دفاعي توان لاره پیاوړې ده او د هیڅ نړیوال قانون خلاف نه ده
د اسلامي ایران ولسمشر په دې باندې په ټینګار سره چې ایران به د خپلې دفاع لپاره د ضرورت وړ وسلو په تولید کښې شک ونه کړي، وویل: د ایران د اسلامي جمهوریت د دفاعي توان لاره پیاوړې ده او د هیڅ نړیوال قانون خلاف نه ده.
حسن روحاني نن سهار په اسلامي شورا (پارلیمان) کښې د علومو، تحقیقات او ټیکنالوجۍ او د انرجۍ د وړاندیزي وزیرانو د اعتماد د راې په غونډه کښې وویل: د ایران اسلامي جمهوریت به د خپلو خلکو د ګټو او امنیت د دفاع لپاره د توغندوي توان زیاتولو ته دوام ورکړي.
ولسمشر روحاني همداشان د برجام (ایټمي موافقې) په وړاندې د امریکې لوظ ماتونو او کارړنګونو ته اشاره وکړه او څرګنده یې کړه: امریکې په دې کړچار سره نړۍ ته وښودله چې د اعتماد وړ نه ده.
د ایران د اسلامي جمهوریت ولسمشر له ترهګرو ډلو د امریکې ملاتړونو ته هم اشاره وکړه او ویې ویل: امریکا د عراق، شام او افغانستان په شمول د سیمې د هیوادونو د ناامنه کولو لامل ده.
روحاني زیاته کړه: امریکې د عراق ټوټې کول غوښتل خو د عراق ولس او حکومت، د ایران اسلامي جمهوریت او د سیمې ځیني هیوادونه د عراق د ځمکنۍ بشپړتیا د خرابیدو خنډ شول.
