د امام حسن مجتبی ع د زوکړې په هکله مبارکي وایو
نن د چهارشنبې ورځ د ۲۰۲۱ میلادي کال د اپریل د میاشتې اتویشتمه (۲۸) د ۱۴۰۰ هجري لمریز کال د غوايي د میاشتې اتمه (۸) او د۱۴۴۲ هجري قمري کال د روژې د مبارکې میاشتې پینځلسمه (۱۵) نیټه ده چې د نړۍ د شیعه مسلمانانو د دوهم (۲) امام حسن مجتبي علیه السلام له نیکمرغه زوکړې سره سمون خوري .
حضرت امام حسن مجتبی چې د دریم (۳) هجري قمري کال د روژې د مبارکې میاشتې په پینځلسمه (۱۵) نیټه په مدینې ښار کښې وزیږیده د نړۍ د شیعه مسلمانانو د لومړي(۱) امام حضرت امیرالمومنین علي بن ابي طالب علیه السلام او د اسلام د ګران پیغمبر حضرت رسول اکرم صلی الله علیه واله وسلم د ګرانې لور حضرت بي بي فاطمه الزهرا سلام الله علیها لومړی زوی و چې خدای پاک دوې دواړو ته عنایت کړ .
حضرت علي علیه السلام او حضرت فاطمه الزهرا سلام الله علیها د خپل لومړي زوي د زوکړې په ورځ خپل ماشوم د خدای پاک ج رسول ته بوتله چې د هغه لپاره نوم انتخاب کړي ، پیغمبر اکرم حضرت محمد ص د خدای په حکم سره د هغه نوم حسن چې معنا یې نیک او پسندیده دی کیښود .
حضرت امام حسن علیه السلام دغه ویاړ درلود چې د خپل ژوند اوه (۷) کلونه د اسلام د ګران پیغمبر او د خپل ګران نیکه حضرت محمد ص تر مهربانۍ او لطف لاندې تیر کړي او هغه حضرت په دغه ارزښتناک فرصت کښې د اسلام د ګران پیغمبر حضرت محمد د وجود له برکت او نور څخه ګټه پورته کړه او له هغه وروسته د خپل ګران پلار حضرت علي علیه السلام لپاره رښتیونی ملګری او تیزهوشه شاګرد و .
د ایران د راډیو او د ټیلي ویژن اداره صداوسیما د حضرت امام حسن مجتبی علیه السلام د نیکمرغه زوکړې د کلیزې په مناسبت د اهل بیت علیه السلام د عصمت او د طهارت د کورنۍ ټولو مینه والو ته د زړه له کومې مبارکي وايي .
