حامدکرزي پاکستان کې د سېلابونو له امله پر اوښتو زیانونو اندېښه ښودلې
د افغانستان پخواني ولسمشر، حامد کرزي د پاکستان په پښتونخوا او ګلګت کې د مرګونو سېلابونو له امله د ځاني او مالي زیانونو له کبله خواشیني څرګنده کړې ده.
د حامد کرزي له دفتره په خپاره شوي بیان کې راغلي، چې هغه د دې تلفاتو له امله د خواخوږۍ او غمشریکۍ مراتب د قربانیانو کورنیو ته وړاندې کوي.
د سیمې چارواکو ویلي، چې د مرګونو سېلابونو له امله د ځاني تلفاتو شمېر له ۳۵۰ تنو هم اوښتی چې پکې ښځې، ماشومان او د ډېر عمر کسان شامل دي.
د دې ځاني تلفاتو تر ټولو زیات یې په بونېر کې دي، چې شمېر یې څه باندې ۲ سوو تنو ته رسېږي.
د یادونې وړ ده چې په تېرو څو ورځو کې پاکستان کې د سختو ورښتونو له امله زورور سیلابونه راووتل او له امله یې خلکو ته درانه مالي او ځاني زیانونه واوښتل.
د وروستیو مالوماتو له مخې د خیبر پښتونخوا په بېلابېلو ولسوالیو کې د وروستیو سختو مرګونو سېلابونو ځاني تلفات تر ۳۵۰ تنو هم واوښتل.
د پښتونخوا چارواکو ویلي، تر ټولو زیات تلفات په بونېر کې دي، چې ۲۱۳ کسان پکې وژل شوي دي.
راپورونه وايي، چې ۱۲ تنه په ګلګت بلتستان او ۱۱ تنه نور په کشمیر کې هم وژل شوي دي.
پښتونخوا کې دا مرګونې سېلابونه د تېرې اوونۍ د سختو ورښتونو له امله د خلکو د استوګنې پر کورونو ورغلي، چې د ښځو او ماشومانو په ګډون یې پراخ مالي زیانونه هم اړولي دي.
د چارواکو د معلوماتو له مخې، د سېلابونو له امله ۵۳۸۰ کورونه ویجاړ او زیانمن شوي دي.
