د پاکستان څنګته کړې شوے وزيراعظم په بوټ سره وويشتل شو
د پاکستان په څنګته کړې شوي وزيراعظم باندې د لاهور په جامعه نعيميه علميه حوزې کښې د هغه د يوې وېنا په دوران کښې د يو احتجاج کونکي له لوري د بوټ ګوزار وشو.
زمونږ د خبريال د رپوټ له مخې نواز شريف د دغه بوټ په ګوزار سره په غوږ ولګېد.
ويل کيږي چې امنيتي ځواکونو دغه بوټ ويشتونکے کس په هم هغه ځاے کښې ووهۀ او وډبوۀ او وې نيوۀ.
پرون هم د پاکستان په سيالکوټ ښار کښې يو پاکستاني ځوان د دغه هېواد د خارجه وزير خواجه محمد آصف په مخ او جامو باندې د رنګ په شيندلو سره په پاکستان کښې په روانو سياستونو باندې خپل احتجاج اعلان کړ چې دغه پاکستاني ځوان هم امنيتي ځواکونو ونيوۀ.
همدارنګ تېره ورځ د پاکستان د کورنيو چارو په وزير احسن اقبال باندې د يوې وېنا په دوران کښې د بوټ ګوزار کړې ؤ.
د پاکستان د راتلونکو انتخاباتو په رانزدې کېدو سره په دغه هېواد کښې د خلقو د رايو د حاصلولو لپاره د ګوندونو تبليغات او هلې ځلې زياتې شوې دي.
