پاکستان د برجام اجرا ته د ټولو لورو پر احترام ټینګار وکړ
د پاکستان د بهرنیو چارو د وزارت ویاند وویل: د ګډ اقدام جامع پروګرام (ایټمي موافقه) په نړۍ کښې د ډیپلماسۍ د کامیابۍ یوه نمونه ده او ټول لوري یې باید احترام وکړي.
د ایرنا د خبر له مخې محمد فیصل نن له کورنیو او بهرنیو رسنیو سره په خپل اونیز خبري کانفرنس کښې په نړیواله سویه د برجام د اهمیت په هکله د یوې پوښتنې په ځواب کښې زیاته کړه: هغه ټول لوري چې د دې ایټمي موافقې په برابرولو او لاسلیکولو کښې یې رول درلود، باید اجرا یې کړي.
د ویلو ده چې د امریکې ولسمشر د روان میلادي کال د مۍ په اتمه نیټه د ایران خلاف د بې بنیاده تورونو په تکرارولو سره له برجامه د واشنګټن وتل او له دریو نه تر شپږو میاشتو پورې موده کښې په ایران باندې یوځل بیا د ایټمي بندیزونو لګیدل یې اعلان کړل.
خو بریطانیا، فرانسې، روسیې، جرمني او اروپايي اتحادیې له ایران سره د شوې ایټمي موافقې د نورو لورو په توګه ویلي دي چې د دغې نړیوالې موافقې ملاتړ کوي.
د پاکستان د خارجه وزارت ویاند همداشان افغانستان ته د امنیت او ثبات د ستنیدو په ضرورت باندې په ټینګار سره زیاته کړه: پاکستان په افغانستان کښې د پایداره امنیت او ټکاؤ تامینیدو ته ژمن دی او له طالب ډلې سره د خبرواترو لپاره د افغانستان د ولسمشر محمد اشرف غني د صلحه غواړي اقدام ملاتړ کوي.
محمد فیصل په دې خبرې سره چې جنګ او پوځي اقدامات د افغانستان حل لاره نه ده، هیله وښودله چې طالب ډله له رامینځه شوي فرصته ګټه پورته کړي او د کابل له حکومت سره د خبرواترو او پخلاینې په بهیر کښې شامل شي.
