اندونیزیا کې لږترلږه ۱۷۴ کسان وژل شوي دي.
زمونږ خبریال وايي د انډونیزیا حکومتي چارواکو ویلي دا کسان تر هغې وروسته تر پښو لاندې شول چې پولیسو د لوبډلو د قهرېدلو مینوالو خورولو لپاره اوښکې بهوونکی ګاز وکاراوه.
د 'ارېما اېف سي' او 'پېرسبایا سورابیا' فوټبال کلبونو ترمنځ دا لوبه د انډونیزیا ختیځ جاوا ټاپو کې کېده چې د ارېما په ماته تمامه شوه.
د فټبال د بایلونکي ټیم پلویان د فټبال په میدان باندې قبضه وکړه چې خپله غصه څرګنده کړي خو پولیسو د حالاتو د کنټرولولو لپاره اوښلن ګازونه وشیندل او بیا یې ډزې هم وکړې چې له کبله یې ۱۷۴ کسان ووژل شول .
تر دې لوبې وروسته هله ګوله کې لږترلږه ۱۸۰ کسان ټپیان شوي هم دي.
په خواله رسنیو خپرو شویو ویډیوګانو کې ښکاري چې مینوال د لوبې د پای له اعلانېدو سره سم لوبغالي ته ورځغلي.
ختیځ جاوا کې د پولیسو یوه مشر ویلي تر دې وروسته پولیسو د اوښکې بهوونکي ګاز ډزې وکړې، چې پایله کې یې ټېل ماټېل جوړ شو او د ځینو خلکو ساه پکې بنده شوه.
په وژل شویو کې دوه پولیس افسران هم شامل دي.
د پولیسو دغه قوماندان زیاتوي: "څلور دېرش کسان لوبغالي کې دننه مړه شول او نورو په روغتون کې ساه ورکړه."
دی وايي "دوی [له لوبغالي] د وتلو پر یوې نقطې ورټول شول او ټېل ماټېل کې د اکسیجن کمېدو له کبله د ساه بندوالی پیدا شوی."
پر خواله رسنیو لاس په لاس کېدونکو ویډیوګانو کې ښکاري چې په ځمکه مړي پراته دي.
د اندونیزیا فوټبال ټولنې "پي اېس اېس ای" ویلي چې د دې پېښې په اړه یې څېړنې پیل کړې دي.
پر دې سربېره دغه هېواد کې د فوټباله غوره لیګ سیالۍ هم یوه اوونۍ ځنډول شوې دي.
