په ترکیې کې د عربستان د کونسلیټ د تالاشۍ غوښتنه
د انقرې حکومت د ال سعود په کورنۍ د اعتراض کوونکي خبریال جمال خاشقجي د ورکیدو په اړه د ترکیې په استانبول کې د عربستان له کونسلیټه د پوښتنو او تالاشۍ غوښتنه وکړه.
د ترکیې د این ټي وي چینل د راپور له مخې د ریاض په سیاستونو د اعتراض کوونکو خبریال له ورکیدو یوه اونۍ وروسته چې په استانبول کې د عربستان کونسلیټ ته له ننوتلو وروسته ورک شو، د انقرې دولت د هغه د د ورکیدو په اړه د دغه کونسلیټ د تالاشۍ او پلټنو غوښتنه کړې ده.
د دغه راپور له مخې په استانبول کې د عربستان د کونسلیټ د تالاشۍ غوښتنه په انقرې کې د دغه هیواد سفیر ته استول شوې ده.
په انقرې کې د عربستان سفیر هم چې تیره چارشنبه په دې اړه د ترکیې خارجه وزارت ته بلل شوی و یو ځل بیا دغه وزارت ته وغوښتل شو.
د سعودي خبریال جمال خاشقجي د ورکیدو کیسې چې لا یې برخلیک نه دی معلوم سعودي عربستان ته یو ځل بیا د رسنیو پام اړولی دی.
دغه خبریال د اکتوبر په دوهمه نیټه کله چې په استانبول کې د عربستان کونسلیټ ته داخل شو ، ورک شوی دی.
دغه فعال سعودي کره کتونکی تیر کال د عربستان د مقاماتو په ځینو فیصلو او په یمن کې د ریاض په مداخلې له اعتراضه وروسته د سعودي رژیم له ویرې له دغه هیواده بهر ته لاړ.
