Bə Nardarani hadisə məhbuson vəkilon təzyiğ kardedən
Dekabri 16-minə ruji Boku Qonə Cinayəton məhkəmədə Nardarani hadisə məhbuson mühakimə dəvom kardəşe. "Maidə.az" sayt bə Meydan TV istinadən xəbə dodə ki, müttəhimon Taleh Bağırzadə çe məhkəmə iclaso tojnie etiraz kardəşone və bə məhkəmə omənin. Hakim Əlevsət Abbasov məhkəmə be müttəhimon dəvunie ğərar doəşe. Müttəhimon nezə odəmonən bımi etiraz kardəşone və məhkəmə salono beşən şən.
Vəkilon Yalçın İmanov və Qulşən Salmanova bə məhkəmə etiraz kardəşone ki, müttəhimon çəvon xidmətiku imtina kardəşone. Bə qorə əvon müttəhimon müdafiə karde nibəznen. Əmo hakimi bə çəvon etirazi məhəl noə nişe, məhkəmə prosesış dəvom kardə. Çimi bə peştə vəkilon həmə bə məhkəmə etiraz kardəşone. Çe hakimiku de Vəkilon Kolleqiya məsləhət karde ro vaxt piəone. Hakimi fasilə elan kardəşe. Fasilə vaxti vəkilon bə Kolleqiya şən ıştə şikayət bəvon təqdim kardəşone. Əmo Vəkilon Kolleqiyadə bəvon votəşone ki, əqər məhkəmədə iştirak nıkon, bəvədə əvoni çe Kolleqiya üzviətiku xaric bəkarden.
Hələ çimi bə navən Siyasi Məhbuson Monitorinqə Mərkəzi Nardarani hadisə məhbuson, məhkəmə şohidon, həmən vəkilon hüğuğon daima daışte, bəvon təzyiğon nişon doe həxədə bəyanat pevolo kardəşonbe. Hokumətiku tələb kardəşonbe ki, bə vəkilon hüğuğon riayət bıko, bə çəvon əmniyyəti zəmanət bıdo, bə şoydon təzyiğ kardeku dast bıkəşo.
