Rəhmani Fəzli:məntəğədə ironi siyasət bə sulh və inkişafi əsosi həmkarətion zumand kardeye.
İron İslam Respublika məmləkəti daxili koon vəziri votışe:məntəğədə ironi siyasət bə ədolət sulh və inkişafi əsosi nığılə həmkarəti və kamilə holətədə hozzı ğəyrəz sionist rejim məntəğədə de həmmə məmləkəton ım əlağon inkişaf bıdə.
Əbdulrıza Rəhmani Fəzli 2 şanbə ruji tehronədə de Azərbaycan Respublika məmləkəti daxili koon vəzir Ramil Osobovi vindımonədə əlavəş karde məntəğə məsəlon və muvzoon bəpe məntəğə məmləkəton tərəfo həl bıbo və desbə ısət məntəğədə coqlə məmləkəton dəxalət məntəğə millətiyu ğəyrəz canq və fəğırəti və beçoəti jəqo ki Əfğanistan,İrağ və suriyə və yəmənədə təşkil bedə muşahidə bedə ni.
İroni daxili koon vəzir eyne holədə de nərkotikə maddon mubarizə bardeyu bə ironi rol işarəş karde və votışe:İron dəvardə sori 800 tonisə ve cur bə curə nərkotikə maddəş kəşf kardə ki ım nərkotikə maddon ğəror be bə məntəğə məmləkəton və peso bə Avropa ovaşto əmmo beynəlxalğə təşkilaton və avropaiyə məmləkəton desbə ısət de nərkotikə maddon mubarizə bardeyu heç qılə koməkışon kardə ni.
əv ıştə sıxanon dəvomədə bə 2 qılə məmləkəti mıştərəkə sərhəddiyə kamisiya fəal be sərhəddon əmniyəti zumand karde iyən əlağon inkişafiyu işarəş karde və sərhəddiyə vıjoron inkişaf does İron və Azərbaycan Respublika həmkarətionədə diğğət doə məsəlonku qıleniş zınə.
Azərbaycan Respublika məmləkəti daxili koon vəzir Ramil Osobov həm votışe: mıtəşəkkilə terroron,nərkotikə maddon və insoni ğaçağ karde mincumlə qonə cinayətonədəy ki dınyoədə inkişafış bə ki İron ım cinayətonədə mubarizə bardeyu çokə hərəkətonış əncom doə.
əv eyne holədə ironi cənub ğərb Əhvaz şəhrədə terroristiyə hadisə xoto səbəsəlomətiş do və əlavəş karde islam dınyo və mıslmonon terarizmiku həmməysə veyə əzob vindən və 2 qılə məmləkət bəpe ıştə həmkarətion məxsusən jıqo cinayəton həxədə məlumaton bə iyandı rosneədə de ciddiyə sorəti mubarizə bıkən.
