Az.R iqlə siyasiə- yəni dini, sıxanə, mətbuatə azadion məhdud bıə devlət nibən, iyo iğtisadi azadionən təzyiğ və məhdudiyyəton jitono bıe iqlə bə respublika ictimaiyyəti ne, bə həmə dınyo məlumebən. Sentyabri 12-ədə Freyzer İnstituti dınyo məmləkəton arədə iğtisadi azadi vəziyyəti barədə ıştə ımsornə hesabat elan kardəşe.

Im sənədədə ğeyd kardə bedə ki, iğtisadi azadion mevcud bıə məmləkətonədə insonon rifah barzə səviyyədə bedə, devlət çe şəhrıvandon mulkiyyət huğuğon, azadə rəğabəti ğanunon təmin kardedə, de monopoliyon inhisari mubarizə bardedə.

Çe “Azadlıq.info” dərc kardə ım sənədi barədə məğalədə votə bedə ki, iğtisadiə azadion təmin bıə devlətonədə 2017-minə sori Umum Daxili Məhsul bə əhali har i nəfəri de miyonə hisobi 36 həzo 770 dollar, əhali becizəti səviyyə isə 1,8%  bıə. İğtisadi azadion məhdud bıə məmləkətonədə UDM 6 həzo 140 dollar, əhali kosibəti isə 27,2% -i ğədərədə bıə. Navğədəmə keşvəronədə əhali umr de miyonə hisobi 79,5 sor, dumoədə mandəyonədə isə 64,4 sor bıə.

Az.R bə həmonə siyahi daxil bıə 162 qılə məmləkoton arədə 116-minə vırədə ğəror ğətəşe. Hamsuə Qurciston 12-minə, Erməniston 27-minə, Rusiya isə 85-minə vırədə mandən. Honq Konq, Sinqapur, Nuə Zelandiya, İsveçrə, İrlandiya, Kanada, Avstraliya iminə 10 qlıə keşvəron arədə vırə qətəşone.

Əliyevi hokuməti Maliyyə Vəzarəti bo vəhədənə sori devlətə budcə həxədə ıştə proqnozon elan kardəşe. Çey doə məlumatomku oşko bedə ki,  2020-minə sori devləti budcə xarcon 25 milyard 600 milyon mənot nəzərədə qətedən ki, ımən ısətnə budcəsən 400 milyon mənot ziyode. Həmonə budcə 57%-i çe Devlətə Natə Fondiku transfer bəkarden. Nati ğıymət 55 dollariku peğətə bıə. Imsornə budcədə çey məzənnə çe 60 dollariku peğətəşonbe.