Ğəfğazi zəvvaron Ərbəin şemonədə iştirak kardero bə İron daxil bıən

Bismillahi rəhmani rəhim, salamunəleykum, hurmətinə radioəməson. “Maide.az” bə “Fars” aqentiyyəti istinadən çe Ostoro şəhəri Ərbəin ğərərqohi doə xəbə bə cəmiyyəti rosniəşe, ki, tosə oktyabrə manqi 10 –minə ruji Ostoro marziku 15 həzo 500 əcnəbiə zəvvar bə İroni ərazi daxil bıə.

Çəvon əksəriyyət çe Az.R , kam miğdar isə çe Rusiya və Qurcistoni şəhrıvandono ibarəte. İmom Rza (ə), İmomzodə İbrahim (ə) və İmomzodə Ğasım (ə) nominə ziyarətqahonədə bəvon xidmət nişon doəşone. Nezə rujonədə zəvvaron miğdar bə çand bəjəm ziyod bıe çəş kardə bedə.

Çe Ərbəin şemoni Mərkəzi sər katib Huseyn Zulfuğari çe İrono bə İrağ ovaştə zəvvaron barədə votəşe ki, çəvon miğdar 1 milyoni dəvardə. 2 milyon 600 həzo zəvvar bə ım şemoni umjən qınie ro bə ğeydiyyat səşone. Çəvon arədə 3 həzo nəfər media numayəndon hestin. “Sepah”i sıxanəvot Ramazan Şərif`i məlumat doəşe ki, İraği əraziədə zəvvaron əmniyyəti çe İroni İnğilabi Pasdaranon Korpusi Ğuds ğıvvon, “Həşdi Şəbi” ğıvvon və İraği polisə ğıvvon muhafizə bəkarden. Bımi ro əvon məxsusiə plan hozo kardəşone, zəvvaron dəvardə roon dırozi və muğəddəsə şəhəronədə zəvvaron rohət hərəkət karde ro bə xidməti infrastrukturonən komək nişon bədon. Bəvon tibbi xidmət və əvoni vırəbəvırə kardə koonədən iştirakşon bəbe.

Əlavən ğeyd karde lozime ki, ımsornə Ərbəin bə oktyabrə manqi 19-minə ruj təsaduf kardedə. Zəvvaron Nəcəf – Kərbəlo istiğamətədə təğribən 80 km roy piyodə bəşen. Dınyo cəmiyyəti arədə ən izdihaminə ım şemonədə ponə sori 20 milyon zəvvari iştirakış hestbe.