İ. Əliyev çe koronavirusə noxəşiku bo siyasiə məğsədon sui- istifadə kardedə.
Əliyevi hokumət de koronavirusə noxəşi vonə siyasiə fəalon təğibi həniən qıvonin kardedə. İlkin Rustəmzadə internetədə qıley petisiya təşkil kardəşe, bə əhali təklif doəşe ki, Boku hokuməti vədə tələb bınon, karantinə rujonədə bə şəhrıvandon 300 mənot muavinət bıdo , əvoni komunalə xarcon və bank kreditonku azad bıko.
Ğıssə muddətədə bə ım petisiya 16 həzosə vey yuzeron dastək doe hokumət bə təşviş dənoşe, polison bino kardışone Rustəmzadə təğib karde. Əv de çey jeni təhdid kardışone, çəyo çey pıə bə polisxonə dəğandışone. İlkin Rustəmzadə nafkonə siyasiə məhbuse, de bıhtonə maddə 6 sor zindonə cəzo kəşəşe. Bı barədə “İnfoteka 24” sayti bə jurnalist Xədicə İsmayıl`i istinadən xəbə doəşe.
Washignton Post rujnomən İlham Əliyevi koronavirusi xətoku məmləkətədə repressiya abı-həvo zumand, siyasiə fəalon təğibi ro sui-istifadə karde həxədə redaksiya məğalə dərc kardəşe. Əyo nıvıştə bedə ki, Əliyev karantinə məhdudiyyətiku ıştə diktatorə rejimi ğoym karde ro istifadə kardedə. Bə siyasiə fəalon, muxalifəti numayəndon, həmən bə mustəğilə mass-mediya fişar nişon dodə. Məğalə muəllif hətto jıqo əməlonədə Əliyevi de Adolf Hitleri və çe İndoneziya nafkonə diktator Suharto muğayisə kardəşe.
Bı rujonədə Prezident Əliyevi de koronavirusi pandemiya əlağədar sinnış 65 sori dəvardə 176 nəfər məhbus azad kardəşe. Çəvon restədə nafkonə Milliə Əmniyyətə Vəzarəti devlətiə cinayətonədə ittiham bıə 2 nəfər qeneraliən vırə qəte Əliyevi ım sərəncom cəmiyyətədə bə tənğidon hədəf kardışe. Mustəğilə huğuğə mudafiəkaron ğeyd kardəşone ki, ım qeneralon 2015-minə sori de çanq qılə qonə cinayətə maddəon bə 12 və 14 sornə zindonə cəzo məhkum kardəşon bıe. Isət əvoni, çəzo muddəti hiç niməyən nıkəşə azad karde bə siyasiə məhbuson munasibətədə qıley həğarəte. Eyən ğeyd bıkəmon ki, əfv bəkəson restədə dini xadim Seyid Fəraməz Abbasov və Nardarani məhbus Eldar Bunyadovən heste.
