Bə Ğərəboğ məntəğə muxtariyət həx doey nibəbe.

Azərbaycan Respublika prezidenti muavin votışe: Bə Ğərəboğ bandiyə məntəğə muxtariyət həxi doe imkanış ni.

Bə Ğəfğaz Həğiğəton sayti zinə ruji raporti əsos, Muhərrəm Əleyev təkidış karde: Ğərəboğ hiç faxt bənə sabiğ vəziyəti nibəvinde iyən bənə dəvardəyon bıə Ğərəboğ muxtar məntəğəku həni xəbə ni boçi ki ım məntəğə həmmişə çı Azərbaycan Respublika sərzəmini i baxş be.

Azərbaycan Respublika prezidenti muavin əlovəş karde: Rusiyə sulhmərominə ğıvvon bo 5 sor Ğərəboğədə bəmanden peşo i tərəf bəpe cəhbə(dave) xəti tərk ko.

Muhərrəm Əleyev ozod bıə əraziədə Azərbaycan Respublika boydəği rost karde həmçenin qədə qədə avarəon bəştə kə oqardeyku xəbəş do iyən votışe: Azərbaycan Respublika mili valyota iyən pul həm ozod bıə məntəğəonədə rəvocin bəbe.

Rusiyə, Azərbaycan Respublika iyən Erməniston 2şanbə ruji Noyabri 10 Ğərəboğədə canqi səkardeyro qıləy mıştərək sazışi imzo kardışone.

Həminə sazişədə sıvoy canqi sə karde, bə humanitar məsələon iyən əsiron və cənazəon vırə bə vırə kardey təkid bıə iyan ğeyd be ki Rusiyə sulhmərominə ğıvvon tımas və dave xəttədə sulhi təmin bəkan.