Muharibə veteranon boçi intihar kardedən

Dıminə Ğərəboği canq 4 manqe ki, orəxə. Təəccubinə koe ki, bı muddəti dırozi həmonə canqi iştirakəkəonədə çand kəsi intihar kardəşe

Ğuba, Yardımli, Daşkəsən və həniən co rayononədə jıqo hadisəon vağeə bıə. Im vəziyyət Respublika cəmiyyətədə bə muzakiron səbəb bıe. Milli Məclisi deputat Razi Nurullayevi bo “Yeni Musavat”i qəp jəşe ki, jıqo hadisəon əsasə səbəb əlbəttə ki, canqi vaxti çəvon dəvuniə psixoloji təzyiğibu, çimi  dıminə səbəb isə çəvon çe tibbi muayinəku kənoədə mandeye. Muharibəku təxrisi bə peş əvon əksərən kədə ıştə ailə əhatədə bedən, səhhətədə krizisşon beədə ixtisasinə psixoloqi koməqiku məhrum bedən, ımən bə bədbəxtə hadisə vardedə bekardedə. Deputati həmən votəşe kİ, har ruj 3-4 nəfər veterani ğəbul kardedə, çəvon həmməy problem eyniey. Canq orəxə bə peş ım problemon həll karde ro xususi qıley təşkilat onoe lozim bıe. Səroste ki, qıley “Yaşat” fondşon onoə. Əmo əv iqlə de veteranon maddi problemon həll karde məşğule. Çəvon səhhəti və psixi problemon isə veteranon ıştən bəpe mualicə bıkardon.

Jurnalist Rey Kərimoğluən votəşe ki, Mərkəzi Hərbi Qospitaldə qıley beaburinə vəziyyət mevcude. Bə ım mərizxonə eqıniə har qılə zəxminə veterani əsəbon darşidə, tibbi personali beetina munasibət əvoni bə intihar hədd rosnidə. Mudafiə Vəzarəti muxtəlif vəsiləonədə nıştə məmuron ıştənbəsəti, veteran və muharibədə iştirakəkəon problemon həll kardeədə çəvonku rışvə tələb karde əvoni qıvoninə vəziyyətədə nodə. İminə muharibə vaxti 1992-minə sori Ğərəboği Əlilon Cəmiyyət onoəşonbe. Bəvədə həmonə cəmiyyəti ım odəmon problemon həllədə xeyli xidmətş bıe. Isətən çok əbi ki, jəqo qıley ğeyri-hokumətə təşkilat onoə bıbo ki, muharibə veteran və əlilon əyo qırd bıe bızınon, ıştə problemon həll karde ro konkret fəaliyyət nişon doe imkanşon bıbo. Bəvədə yəğin ki, çəvon arədə intiharə hadisəonən dəbəparçie.

İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.