AZAL-ədə ğıyməton boçi bohon?
Prezident İlham Əliyev AZAL avisiya şirkət bə Azərbaycan İnvestisiya Holdinqi tərkib daxil karde barədə sərəncom doədə , Respublika əhaliku jıqo qıley bovə bə əməl oməbe ki, ım monopolistə şirkət bə aviasiya vıjori tələbon muvafiğ siyasət bəbarde, çey təklif kardə ğıymətonən bə vıjori təklifon muvafiğ bəben
Eyən bə yod buəmon ki, hələ 2015-minə sori Əliyevi Vəziron Kabineti iclasədə ğeyd kardəşbe ki, bə aviabileton ğıyməti suni şəkilədə boho karde ro doe əbıni, bə səbəb ki, devlət bə AZAL- i sutemoni de erjonə ğıyməti dodə, həvapeymaon de devləti puli hıridə, aeroport xidmətonən bə devləti budcə hisob icra bedən.
Əlavən bıvotəmon ki, 2020-minə sori bə AZAL-i devləti tərəfo 87 milyon mənot dotasiya doə bə. Bəs ım şirkəti bəştə devləti şəhrıvandon munasibətədə jıqo talanqərə ğiymətə siyasəti səbəb çiçebu?
Perzidenti həmonə noğsanon ğeyd kardə çə vaxtiku beynəlxalğə aviasiya vıjorədə erjonə xidmət təklif kardə loukoster şirkəton bə ko dəşən, ımən avia pəremoni qıyməton xeyli erjon kardəşe. Əmo ım məsələ Azərbaycanə aviavıjorədə ıştə vırə qəte zınəşni, bə səbəb ki, ım sahə bənə məmləkəti iğtisadiyyati co sahəon iqlə monopolistə şirkəti çanqi jitonoe. Imən bey vardedə bekardedə ki, şəhrıvandon şedən Tbilisiədə bilet peqətedən, çe Qurcistoni aviaşirkəton xidmətku istifadə kardedən. Çunki, çə şirkəton bileti ğıymət çe AZAL-i ğıymətonsə 4-5 ğat erjone. Hejo Rusiyadən vəziyyət ım curey, daxili aviareyson xeyli erjonin. Məsələn , Yekaterinburğ-Moskva reysi qıymət çe 27 dollariku bino bedə. Yekaterinburğ – Yerevan reys bə 71 dollar, Yekaterinburğ- İstambul bə 130 dollarebu, Yekaterinburğ- Boku reysi ən erjonə ğıymət 260 dollare. Moskva- İstambul çe 95 dollariku, Moskva- Boku reysi ğıymət isə çe 215 dollariku bino bedə.
“Teref.az” sayti bı məsələ qıley təhlili məğalə həsr kardəşe. Deputat Rufət Ğuliyevi AZAL-i mevğe mudafiə kardəşe, votəşe ki, loukoster şirkəton bə məmləkət vanıdoe səbəb əve ki, AZAL monopoliste , ıştə monopolistə mevğe çe dasto doeş pidəni. İğtisadşunas Nemət Əliyevən ğeyd kardəşe ki, qıyməton erjon karde yekanə ro Azərbaycanədə azad rəğabəti bərğəror kardeədəy. Əliyevi hokumətən bımi ro nibədo, çunki jəqo holədə devləti monopolistə şirkəton ki, məmləkəti iğtisadiyyati həmə sahəon etənəşone, tamamən muflis bəben.
İbrimi Zahirəddin. Çe Rusiya Yekaterinburğ şəhəriku. İİR sədo, tolışi radio.
