Taleh Bağırzadə və çey həmməsləkon məhkəmə bə orəx rəsedə
De Nardarani hadison əlağədar dəstqir bıə Taleh Bağırzadə və çey həmməsləkon məhkəmə bə orəx rəsedə. Yanvari 19- ədə de Fuad Ğəhrəmanli və Abbas Ğuliyevi orəxnə qəpon məhbuson votemonon bə axır rəsən.
Çimi bə nav digər 16 nəfər məhbusonən ıştə orəxnə qəpon jəşonbe. Taleh Bağırzadə votəşe ki, Nardarani hadisə bo hokuməti qıley siyo ləkə, bo Azərbaycani isə şərəfinə tarixe. Əmə de ğoldurə hokuməti vəbəvə mandəmon. Əvon ğarət, dızdiəti, rışvəxorəti bə devləti siyasət peqordıniəşone. Nardaranədə Yezid lənətullahi ısətnə əvlodon Kərbəlo mısibət təkrar kardışone. Ğəsəbə bə mühasirə seşone, ov, bərğ ğət kardışone. Şəhidon meyton girov oqətışone. Əmə devləti peqordınie məğsədımon bıə ni. İm devləti peqordıniəkəs İlham Əliyev ıştəne.
Fuad Ğəhrəmanli votəşe ki, ım məhkəmə hokuməti saxtakarəti ifşa kardışe. Hakimon çanədə ğeyri-ğanuniə hərəkəton bıkonən, hokuməti cinayətə əməlon eparçınie nıznışone. Şamil Abduləliyevi ıştə orəxnə sıxanədə ğeyd kardəşe ki, hokumətədə nıştəkəson jıqo çırkinə hərəkəton karde səbəb əve ki, əvon ıştə mevğe gin kardeku tarsedən. Abbas Təğizadə, Rasim Cəbrayilov, Zakir Mustafayev, Əli Nuriyev, Abbas Ğuliyev və digər məhbuson ıştənşon qınokar zınəni və ittihamon rədd kardəşone.
Hakim məhkəmə hukmi keynə elan karde vaxt votəş ni. Əmo nezə vaxtonədə hukm elan bənine.
