Putin de Rəisi vindemonədə votışe: həmmə baxşonədə İron və Rusiyə rabitəon bə inkişof rəsey holədəy.
Rusiyə prezident işorəş karde ki Tehron iyən Moskva həmkoətion stratejikə təvafuğnomə oxonə mərhələdə ğərorış qəte iyən votışe: həmmə baxşonədə İron və Rusiyə rabitəon bə inkişof rəsey holədəy.
Bə İrna raporti əsos, zinə Ozbəkistoni Səmərğəndədə Şanxay həmkoəti təşkilati uzv bıə kişvəron yolon 22 minnə icosi kənoədə, Rusiyə prezident, Veladimier Putin, de İron İslam Respublika prezident Sed İbrahim Rəisi vindemonədə əlovəş karde: həmmə baxşonədə İron və Rusiyə rabitəon bə inkişof rəsey holədəy iyən 2tərəfiyə həmkoətion təvafuğnomə koon bə oxo rəsey nez bıə, ım təvafuğnomə bois bəbe 2 tərəfiyə rabitəon bə tojə səth bırəsi.
Putin ijən təsdiğış karde: Şanxay həmkoəti təşkilatədə İroni uzv beyro həmmə koon əncom bəbe.
Rusiyə prezident həmçınin İslamiyə İnğilobi yolə Rəhbər Ayətullah Xameneiku ğədedonətiş karde iyən votışe: ə Həzrəti himoyəon bois bıə ta veyə mıştərəkə planonədə, İron və Rusiyə bə inkişof bırəsən.
Putin işorəş karde ki dəvardə sorədə, İron və Rusiyə miyono ticarət, 81 faiz iyən ımsori iminnə 5 manqədə həm 30 faiz əlovə bıə, Putin ijən votışe: vəoməy haftədə 80 qılə Rusiyə Yolə kəmpaniya nımoyəndəon bə İron vığandə bəben.
Çoşəmbə rujədə, İron İslam Respublika prezident, Sed İbrahim Rəisi, Ozbəkistoni prezident, Şokət Mirziyafi rəsmiyə dəvəti əsos və deştə iğtisodi və siyasi ali rəsmi şəxson bə ico bə Ozbəkiston səfərış karde, ğərore ım səfərədə İroni prezident 2 tərəfiyə rəsmi vindemon əncom bıdə iyən Şanxay həmkoəti təşkilati yolon 2minnə iclosədə həm iştirok ko.
Şanxay həmkari təşkilot qıləy dıvlətiyə beynəlxalğə təşkilate ki Miladi 2001 minnə sori İyolə manqi 15 minnə rujədə Ğəzaxıston, Çin, Ğığizıston, Rusiyə, Tacikiston və Uzbəkistoni səmtiku təsis bıə. Hindostan, Ğəzaxıston, Çin, Ğırğizıston, Pakiston, Rusiyə, Tacikiston və Ozbəkiston Şanxay məntəğə iğtisodi təşkilati 8 qılə uzvin. ısət İron İslam Respublika həm Şanxay həmkari təşkilatədə pidəşe bənə damə uzvi əlovə bıbu və ğərore Səmərğənd iclosədə de ım təşkilati yolon vositə, İroni daimə uzv bey həm imzo bıbu.
Monqolustan, Əfğanıston iyən Belarusiya, Şanxay təşkilati nəzorətəkə uzvin.
