De oxonə iyande nıdərəson peqətey hədəfi, Əmriəbdullahiyan iyən Ceyhon Bayramevi votımon.
İroni xarıci vəzir de Azərbaycan Respublika xarıci vəzir telefoniyə votımonədə, oxonə rujonədə ğeyre realizmə sıxənon bəyon beyku ıştə norizoyəti elanış kardə iyən bə yande hakımiyət, kişvəron ərzi təmamiyyət ehtırom noey iyən kişvəron daxıli koonədə mıdoxilə nıkardey bənə qıləy muhimm prinsip zıneydə.
oxonə haftəonədə, çand kərə İron və Azərbaycan Respublika rabitəon daveon iyən ixtilafon şoyd be. dəvardə Pencşəmbədə bə İorn İslam Respublika ələyh Azərbaycan Respublika rəsmi şəxson və mediyaon anti İron rəftoron ijən İroni barədə siyohə obrazi təbliğon nışo doey bəpeşt,Tehronədə bıə Azərbaycan Respublika səfir bə xarıci vəzarətxonə vınq bıə be.
Im vanq kardeyədə, xarıci vəzarətxonə Avrasiya mudir iyən vəziri dəstyar, Azərbaycan Respublika ali rəsmi şəxson ğeyri dustanə sıxənon və ım kişvəri mediyaon İroni barədə siyohə obrazi təbliğon nışo doey barədə, İron İslam Respublika şiddətinə etırozi bə Azərbaycan Respublika səfir elanış kardə be.
Azərbaycan Respublika səfir həm icod bıə vəziyətiku ıştə təəssufi elanış kardə be və ğəror bıə vey rə İron İslam Respublika etırazon bə Boku rəsmi şəxson bırosno.
Bə İrna raporti əsos, ım telefoniyə votımonədə, İroni xarıci vəzir, Huseyn Əmirəbdullahiyan ixtilafon və iyande nıdərəseon peqəteyro vey çokə roy, rəsmi və diplomatiya roon votımon kardey zıneydə və təkidış karde: mediyaonədə jıqo mıvzoon bəyon kardey nə fəğət bə məsələ həlli komək kardedə ni bəlkəm deşmonon iyande nıdərəsəonro zəminəon icod ko.
Əmirəbdullahiyan ijən işorəş karde ki de hamsuyəon əcumlə Azərbaycan Respublika rabitəon inkişof doey, İron İslam Respublika xarıci soyasəti muhimmə koonin, əv ijən bə 2 qılə kişvəri miyono rabitəon həmmə tərəfiyə zumandəti təkidış karde.
Əmirəbdullahiyan həmçınin Azərbaycan Respublika xarıci vəziriku dəvətış kardə ki İron İslam Respublika təşəbbusi iclosədə ki bə 3+3 nomo bıə iclos məşhure iştirok bıkə,və de ım iclosi vositə, və diplomatiya royku məntəğə məsələon həlliro bənə çarçob əməl ko.
Azərbaycan Respublika xarıci vəzir, Ceyhon Bayramov həm ım telefoniyə votımonədə, Astanədə bə 2 qılə kişvəri prezidenton oxonə vindemon, Tehron və Boku rəsmi şəxson miyono sıhbəton iyən votımonon vey mısbət zıneydə və iyande nıdərəseon peqətey və rabitəon zumand kardey cəhəto, bə Azərbaycan Respublika hozzoəti təkidış karde.
Im vindemonədə 2 tərəf iyande nıdərəseon peqətey iyən dustanə rabitəon zumand kardeyro bə 2 qılə kişvəri muxtəlifə baxşon iyən təşkilaton miyono rabitəon zumandəti iyən dəvomi zərrurət təkidışon kardə.
