Suriyə və İraği şimolədə Tırkiyə ğeyri ğanuniyə hərbi əməliyoton dəvom
Suriyə və İraği şimolədə, Tırkiyə ərtışi hərbiçion ıştə ğeyri ğanuniyə hərbi əməliyoton dəvomədə, 22 nəfər PKK və YPQ uzvon kıştışone.
Ankara, Kırdıstoni koəkəyon partiya(PKK) və ım qrupi Suriyə şubə yəni YPQ terroristiyə qrupon siyohədə ğərorış do və əlovə bə Tırkiyə daxıl, Suriyə və İraği şimoli məntəğəonədə həm bə de ım qrupon mubarizə bardey bəhonə, ıştə ğeyri ğanuniyə əməliyoton dəvom dodə. Çand kərə Bəğdad və Dəməşğ bə Tırkiyə ərtışi ım hərbi əməliyoti etırozışon kardə və ım əməliyoton çı İrağ və Suriyə ərzi təmamiyyəti darşiye nımonə zınedən.
Bə Anatoli aqentiyəti raporti əsos, Tırkiyə mudafiə vəzarətxonə qıləy bəyoniyə ğolibədə Tvitterədə elanış karde: Şənbə və Cımə rujədə 22 nəfər çı PKK və YPQ terroristə uzvon kıştə bıən ki 10 nəfər çəvonku İraği şimolədə və 12 nəfər həm Suriyə şimolədə bin.
Həmçınin ım bəyoniyədə Suriyə və İraği şimolədə bə Tırkiyə silohinə hərbiçion hərbi əməliyoti de zumandəti əvomi işorə bıə iyən omə ki har vırə ki lozim bıbu əmə bəmandemon.
