De Suriyə rabitəon bəji kardeyro Tırkiyə rəsmi şəxson təkid

Dəvardə soronədə, Tırkiyə rəsmi şəxson de Suriyə deşmənçiyəti iyən de ım kişvəri dıvləti mıxulifə qrupon fəaliyəton həmroəti bəpeşt, ısət deştə həmmə cəhdon vositə, de Dəmeşği rabitəon bəji kardey dumoədən.

Dəvardə manqonədə, Ankara de Dəmeşği rabitəon icod kardeyro ıştə hozzoəti elanışon kardə, və təğribən Tırkiyə həmmə rəsmi şəxson əcumlə çəy prezident, Rəcəb Təyyeb Ərdoğan, xarıci vəzir, kişvəri vəzir iyən hkimə partiya uzvon( ədolət iyən inkişof), həminə rabitəon har çəxtə icod iyən lovəş kardeyro vey meylışon be.

Dəvardə haftədə, Rusiyə, Suriyə iyən Tırkiyə mudafiə vəziron, Suriyə bohron, avarəon məsələ iyən Moskvaədə de terrorizmi mubarizə bardey həlləkə roon təğib kardeyro 3tərəfiyə muzakirəon əncomşon do. Dəvardə 11 sori mıddətədə, ım vindemon Ankara yən Dəmeşği rəsmi şəxson iminnə vindemon be.

Bə cımə ruji Tele-Rədio aqentiyəti raporti əsos, Tırkiyə prezident Rəcəb Təyyeb Ərdoğan, məntəğədə sulh icod kardeyro, de Suriyə prezident Bəşar əsədi vindemoni ehtımoliku xəbəş do iyən votışe: ğərore ki ım soron mıddətədə və iminnə kərəro iyən de rabitəon zumand kardey cəhəton, de Tırkiyə, Rusiyə iyən Suriyə vəziron iştiroki vositə, 3tərəfiyə iclos bərpo bıbu.

De Suriyə rabitəon normal kardey barədə, Tırkiyə rəsmi şəxson sıxənon, qıləy holədə bərpo bəbe ki vey zəmone ki Tırkiyə hərbiçion ım kişvəri məntəğəonədə de terrorizm mubarizə bardey bəhonə, ım kişvərədə iştirokışe və əməliyoton əncom doey holədəy.

Tosə bə ısət, ım əməliyotədə Tırkiyə muvəffəğiyətış nıbe və ğasbu ım pidəşe de Suriyə rabitə bərğəror kardey vositə, ım problemi həl ko.