Ruhani: İron və Azərbaycan Respublika miyono rabitəon bə inkişofi tərəfe ijən stratejikə səthədə heste.

İroni prezident İron və Azərbaycan Respublika miyono rabitəon bə bıvəti iyən stratejikon əsos tosifış kardə və votışe: Tehron və Buko miyono 2 tərəfə rabitəon bə inkişofi tərəf şedə ijən siyasi, mədəni, mənətğə və beynəl xalğ cəhətiku vey əhəmmiyətış heste.

İroni prezident Həsən Ruhani, zinə Tehronədə İron və Azərbaycan Respublika miyono ali rutbəinə heyəton mulağaton bəpeştə jurnaliston cəmədə votışe: dəvardə manqonədə İron və Azərbaycan Respublika miyono ticarəti miğdori ziyod bey, 2 qılə kişvəri miyono rabitəon bə inkişofi tərəf hərəkət kardeku neşonəy.

Ruhani təsdiğış kardə: simal-cənub tranzitədə 2 qılə kişvər vey muhimmə rolışon heste və de Ostoro-Ostoro ğətariyə xətti bino karde, ım sahədə i minnə muhimmə ğədəm peqətə bıə.

Ruhani bə 2 qılə kişvəri muzakirəon Kaspi dıyoədə nati istihsal karde xoto işarəş kardə ijən votışe: Xəzə dıyo nati ehtiyatonku istifodə karde xoto vəziron muzakirəon de tosə bə oxonə nəticəon rəse hejo dəvom pəydo bəkay.

Əv bə İron, Azərbaycan Respublika və Rusiyə ijən İron, Azərbaycan Respublika və Tırkiyə miyono 3 tərəfiyə rabitəon işorə və təsdiğəş kardə: həminə həmkarion sayədə məntəğədə çandə çokə hərərəkəton əncom bıə.

İroni prezident məntəğə məsələon barədə həm votışe: məntəğə və terrorizmi barədə həm Tehron-Buko mıştərikə vindemonışone ijən eteğadışone ki məntəğədə Sələfi və Vəhhabiyət əğidəon vey yolə xətəre ki bəbe məhv iyən hışk bıbu.

Ruhani ijən Suriyə və İraği bohranon barədə bə İron və Azərbaycan Respublika miyono mıştərikə vindemonon işarəş kardə və omidvar be ki: Ğərəboği bohran həm siyasi cəhətiku həl bıbu.

Azərbaycan Respublika prezident İlham Əliyev həm zinə ruji iclosədə de İron jıqo nezə əloğəonış bə məntəğə qıləy baxşe hisobış kardə və votışe: dəvardə 3 sori mıddətədə de İroni prezident çand kərə mıloğat karde həminə hevujə hamkarionku əlomət və nışonəy.

İlham Əliyev təsdiğış kardə, İron və Azərbaycan Respublika miyono siyasi həmkarion həm ali səthədə dəvomış heste ijən 2 qılə kişvər həmmə beynəl xalğ təşkilatonədə yandeku himoyə kardedən.

Əv həmçınin bo Ğərəboği bohrani həl bey xoto bə İroni cəhdon təşəkkurış kardə ijən əlovəş kardə ki: Ğərəboği muzu bə ərazi təmamiyət, ədalət iyən insofi əsos heste ki İron hıjo bəy himoyə dorəti kardedə.