İron, Rusiyə, Suriyə və Tırkiyə mıştərəkə iclosiro hozzoəti
Rusiyə ali diplomat xəbəş do: İron, Rusiyə, Suriyə və Tırkiyə xarıci vəziron mıştərik iclosi bərpo beyro, muğəddəmə koon hozzo bey holədəy.
Rusiyə xarıci vəzir, Serqey Lavrov Ankaraədəy de Tırkiyə xarıci vəzir Mevlud Çavoş Oğlo bə ico, qıləy mıştərkə xəbəiyə iclosədə iştirokış kardə. ım xəbəiyə iclosədə bəyon bıə məsələonku qıləyni İron, Rusiyə, Suriyə və Tırkiyə xarıci vəziron 4tərəfiyə iclosi dəvoniye be.
Bə İrna raporti əsos, Rusiyə xarıci vəzir, Serqey Lavrof bə ım nuktə işorəş karde və votışe: tərəfon ım iclosi zəmoniro və Tırkiyə iyən Suriyə rabitəon normal kardey prossesi bino beyro deyande sıhbət kardeşone.
Lavrov ijən əlovəş kardə: dəvardə sori Dekabriku, həmçınin Mart və Aprelədə, mudafiə vəziron, xarıci vəziron muavinon və kəşfiyot yolon ğolibədə, ım iclos bərpo bıə, həminə prossesi bino bey nışonəy.
Rusiyə xarıci vəzir Suriyə daveonədə həmmə kəson ğanuniyə mənafe miyono balans icod kardey barədə, muzakirəkəyon təvafuğ zərruri zınəş.
Tırkiyə xarıci vəzir, Mevlud Çavoş Oğlo həm Aprelə manqi 4 minnə rujədə, Moskvaədə İron, Rusiyə, Suriyə və Tırkiyə xarıci vəziron muavinon iclosi bərpo beyro, Rusiyəku ğədrdonətiş kardə və votışe: umudəvomon ki bənə dəvardəyon Suriyə bıhroni həlli prosses dəvomış bıbu.
Lavrov ıştə sıxənon co baxşonədə Ukrayna bıhroni barədə votışe: Ukrayna bıhrani həlliro muzakirəon əncom bey holədəy ki bəvədə bə Rusiyə ğanuniyə mənafe və niqəronion diğğət bəbe.
