Əmirəbdullahiyan: Azərbaycan Respublika, İroni torixi nəğliyoti roon dəbastey dumoədə ni

Omujnıqıniyə Hərəkoti xarici koon vəziron iclosi kənoədə İroni xarıci vəzir təkidış kardə: Azərbaycan Respublika peştıpurətiş do ki İroni torixi dəçokne roon dəbastey dumoədə ni.

İroni xarıci vəzir Huseyn Əmirəbdullahiyan, Omujnıqıniyə Hərəkoti xarici koon vəziron iclosədə iştirok kardeyro bə Boku səfərış kardə.

Əmirəbdullahiyan de Azərbaycan Respublika prezdent, İlham Əliyevi vindemonədə votışe: Əliyev təkidış kardə ki Azərbaycan Respublika İroni torixi dəçokne roon dəbastey dumoədə nıbe iyən nibəbe.

Bə İrna raporti əsos, İroni xarıci vəzir ıştə sıxənon dəvomədə əlovəş kardə: Azərbaycan Respublika əmniyyət ıştə əmniyyət və məntəğə əmniyyət zınəmone və Tehronədə bıə Azərbaycan Respublika səforətxonədə hodisə barədə de Azərbaycan Respublika prezdent votımonış kardə.

İroni xarıci vəzir ijən əlovəş kardə: jəqo ki İroni İslomiyə məhkəmə ğıvvə sıxənəvot elanış kardə, həminə məsələ barədə, İron ıştə təhğiğon komil kardəşe.

Əmirəbdullahiyan həmçınin votışe: de Azərbaycan Respublika dustə iyən bıvə kişvər bərobərə nəzəmon heste.

İroni xarıci vəzir ijən votışe: Azərbaycan Respublika iyən İroni millət deyande veyə mıştərəkəçiyon soybin və bəpe 2 qılə kişvəri milləti şe-omey və həmmə tərəfiyə həmkoətion ıştə vey çokə vəziyətədə əncom bıbu.