Kermani terroristiyə hodisə barədə Tırkiyə parlamenti sədr de İroni parlamenti sədr telefoniyə votımonış əncom do
Tırkiyə parlamenti sədr de İroni parlamenti sədr, İroni cənubi Kerman ostanədə terroristiyə həmləon ki kali şahrvandon şəhid və zəxmin bey bois bıə, məhkumış kardə iyən bə İronıjon təsliyət votışe.
Dəvardə Çoşambə(Yanvar 3) Sepah təşkiloti “Ğuds” ğıvvon sabiğ komandan, şəhid general Ğasım Suleymani çominə sorəqardışi mərosimi zəmonədə və çe İroni cənub, Kermanədə bə Qolzare Şuhadə tərəf şıə roysə dıqlə intihorçiyə terroristi ki, DAİŞ terroristi qrupi çəy məsuliyyətış bəştə ehdəş peqətə intihori əməliyyotışon əncom do.
Çın teroristə əməliyyoti nəticədə mərosimi zəvvoron miyono 91 nəfər şəhid bıə və 284 nəfər həm zəxmin bıən ki şəhidonku 22 nəfər tələbə bin.
Dınyo veyə ali rəsmi şəxson və yolon cobəco mesajon ğolibədə İroni kali şahrvandon şəhodəti təsliyət votey kənoədə, ım terroristiyə hərəkəti məhkumışon kardə.
İ Bıə Milləton Təşkilati sərkatib, Avropa ittifoğ, beynəlxalğə təşkilaton, siyodi icloson, siyosi və məzhəbi rəhbəron iyən rəsmi şəxson, koşınason və təhliləkəyon, ğərbi, ərəbi və islami devləton, Afrika və Asiya kişvəron həm rəsmi surəti, və de bəyoniyəon muntəşir kardey vositə, ım terroristiyə hodisə ki molki şəxson və beqınohə insonon kıştey bois bıə məhkumışon kardə və de İroni milləti ıştə hamdardi elonışon kardə.
Bə təsnim aqentiyəti raporti əsos, Pencşəmbə rujədə Tırkiyə parlamenti sədr, Nəeman Kortolmoş de İroni İslomi parlamenti sədr, Muhəmməd Bağır Ğalibafi telefoniyə votımonədə votışe: terrorizm və terroristiyə qrupon çerkinə əbzoronin ki kişvəron təhrik kardeyro istifodə bəben.
Kortolmoş ijən bəyonış kardə ki bə terroristiyə qrupon xoto, millət veyə dardışon vində, əv ijən lovəş kardə: məntəğə kişvəron məsul hestin ki terrorizmi həğiğəti bə vey çokə surət dərk bıkon və həmçınin anti terrorizmi səmimanə həmkoətion inkişof bıdən.
İroni İslomi Parlamenti sədr həm Kermani terroristiyə hodisə təsliyət votışe iyən dəvomış do: deşmonon hərəkəton, de terrorizm mubarizə bardeyədə İroni milləti ğoym və təəhudinə irodədə hiç təsirış ni.
