Məmləkətədə devləti vərzeşə siyasət
Əliyevi hokumət məmləkətədə vərzeşi inkişafi daima ıştə diğğət mərkəzədə oqətedə. Təsadufi ni ki, Perzident həmən çe Azərbaycani Olimpiya Komitə rəhbəre. Həmə rayononədə vərzeşə sarayon dutəşone, şəhrvandon bə vərzeş cəlb karde po har imkan soxtəbə. Respublika Vərzeşə Federasion har qılə bə qıley nazir və ya oliqarxi təhkim kardəşone ki, Az.R komandon beynəlxalq musabiğatonədə veyə nailiyyəton bə dast buon, demiən devləti nufuzi dınyoədə barz bıkon.
Əmo çoko ki, çe devləti həmə vəsilon de korrupsiya və "pripiska" məşğulin, vərzeş sahədən vəziyyət eynən həmon cure. "Korrupsiya.az" sayt nıvıştedə ki, Azərbaycanədə çanədə vərzeşə federasiyon hestin ki, hiç qıley fəaliyyət nişone. Əvon bə Vərzeşə Vəzarəti soxtə plan təğdim kardedən ki, quya çand qılə turnironədə iştirak bəkarden, bımiro devləti büdcəku çanədə pul sedən. Əmo nə qıley komanda, nəən qıley vərzeşkar nişone. Məsələn, Badminton Federasiya ki, sədrış Təhsil Vəzarəti nazir Mikayıl Cabbarove, ımsor 5 qılə beynəlxalğ musabiğatədə iştirak karde bəyon kardəşe. Əmo hiç qıley komanda nişe, respublika daxilədən hiç qıley tədbir dəvunidəni. Boulinq, Slalom, Bilyard, Damkə, Mizisəpeə tennis, rəhbərış İğtisadiyyati nazir Şahin Mustafayeve, Tennis, rəhbərış MM spiker Oğtay Əsədove, Konkiromə, Sınovharsəyə federasiyonədən vəziyyət ım curəy. Budcəku pul sedən, əmo fəaliyyətşon ni.
"Azadlıq.info"ən Xorvatiyadə dəvardə Qoniroskardeə Avropa musabiğatədə Azərbaycani komanda sərqozəştonku xəbə doşe. 7 nəfərədə ibarət komanda omə bə ım məmləkət, çempionat bino nıbə oqardə bə Azərbaycan. Çəvrey mətbuat nıvıştəşe ki, çimi səbəb yəğin ki, de dopinq təftişi əlağədar bıə. Əmo Azərbaycani Qonə Atletika Federasiya mətbuat xidməti mudir Məstəliyevi votəşe ki, əvon bə İslamə Həmrayə Hənəkon hozo be səbəbiku bə Xorvatiya 2 nəfər ehtiyatə vərzeşkar vığandəşonbe.
Əmo ey çəvon bə dumo oqordınie səbəb izah kardəş ni.
