Nardarani hadisə məhbuson məhkəmədə mərəşulə nəticədə hakim iclasi bə təxir eğande məcbur bıə
Mayə manqi 1-minə ruji Boku Qonə Cinayəton Məhkəmədə Nardarani hadisə məhbuson - Haci Zulfiğar Mikayılzadə və dey bahəm 11 nəfəri muhakimə dəvom kardəşe. Qıley polis nəfəri bənə şoydi ifadə doədə mikrofoni nosazəti səbəbiku çey sədo məsə bəni.
Məhkəmədə iştirakəkon ey məse mumkun nıbe çand bəjəm bə hakimi nəzə rosniəşone, əmo ey bımon məhəl noə nişe. Çəyo məhkəmə zalədə bıə jurnalist çe şoydiku tikəvoney de barzə vanqi qəp je xahiş kardeədə hakim Zeynal Ağayevi əvış çe zalo tojniə. "Vətənuğrunda.az" sayti sərdar Revşən Əhmədli bə hakimi ım curə kobudəti ıştə etirazi voteədə, hakim bə çey munasibətədən jıqo hərəkət kardəşe. Hacı Zulfuqar Mikayılzadə çeyku jurnaliston bə zal oqırdınie tələb kardəşe. Hakimi ım tələbən rədd kardə bə peştə məhbuson həmə ıştə peşt qordıniəşone bey, bino kardəşone dumoyəndı zolımon bo məhvi ro bə Xıdo dıvo karde. Məhkəmədə məhbuson tərəfo iştirakəkonən dəvon bə ico de "İlahi, zolımon məhvo-nabud bıkə, Amin" vanqi Xıdoşon sədo kardə. Jıqo vəziyyətədə məhkəmə nimədə mandə, hakimi məhkəmə zal tərk kardəşe. Bi barədə ətrofinə repoltaj çe Bəşəri Huğuğon Tədğiğat Mərkəzi "az.truthngo.org" sayti pevolo kardəşe.
Bımi oxşəşə vəziyyət Nardarani hadisə məhbuson diqər məhkəmə iclasədən vağeə bıə. Hakim Mayıl Bayramovi de məhbus Elçin Ğasımovi arədə hesıbes eqıniə. Ğasımovi bə hakimi votəşe ki, əv ıştən bə ğanuni əməl kardedəni, ey daima darıştedə, bə səbəbən əmə ey hakim hisob kardedənimon.
İm məhkəmə proseson mayə manqi 5 və 8 -minə rujonədə dəvom bəkarde.
