Haci Cavad məçit rıjnişone
Boku hokuməti axır ki, Haci Cavad məçit rıjnişe. İyuni 30-də şanqo şəvi nimədə texnika vardışone, bino kardışone ım tarixi, həmən muğəddəsə bina oçınie.
Xeyli miğdarədə polison məçit əhatə kardəşon be, əvon bə əhali ey oşinie mane be ro imkan doəşon ni. Bə hokuməti ım bəd əməli etiraz kardə imoninə odəmon bə "Azadlıq.org"- i muxbiri votəşone ki, hokuməti tojə məcit inşa kardə bəpeştə ım məçiti oçınie vəd kardəşbe. Əmo ey bı səfən əhaliş bə dast dənoe. İştə sıxani səpe nımande, bəştə vədi xilaf beşe.
Yasamal rayoni İcra Hakimiyyəti sərdar İbrahim Mehdiyevi bə APA TV votəşe ki, rayoni Şərifzadə kuçədə tojə məçit bo vəhədənə sori Rujə İdi bə istifadə doe nəzərədə qətəşone. Ğəfğaz Mısılmonon İdarə sədri muavini, həmən de Dini Təşkilaton Əlağədar Devlətə Komitə sədr Mubariz Ğurbanliən ım xəbə təsdiğ kardəşone, əlavən votəşone ki, bəzi ğıvvon hestin, arə bəyəndı jeşon pidə, əvon bəştə məğsədi rəse nibəznen.
Prezident İ. Əliyevi Yasamal Rayoni İcra Hakimiyyəti sərdar İ. Mehdiyevış çe koyku azad karde. Çe Prezidenti koməkçi Əli Həsənovi izah kardəşe ki, bəpe tojə məçit bə istifadə doə bəpeşt kanə məcit oçıniə bəbi. Əmo içra sərdar həmonə məçiti oçınie barədə ıştənbəsə ğəror doəşe. Bə səbəb prezidenti əvış çe vəzifəku bə kəno noə.
Bokuədə Əbubəkr məçiti dindaronədə i ğismi Suriya və İrağədə bə terrorçiə dastəon umjən qınie səbəbiku hokuməti xeyli vaxtbe ki əv dəbastəş be. Isət ım məçiti sənibəton oj be imkani həxədə "İslamazəri.com" sayti xəbə dərc kardəşe.
