Pars Today

İyulə manqi 7-minə ruji Boku Qonə Cinayəton Məhkəmədə de Nardarani hadisə əlağədar dəstqir bıə məhbusonədə Zulfiğar Mikayılzadə, Seyid Elman Ağayev və çəvon 10 nəfər həmməsləkon muhakimə dəvom kardəşe.

"Vətən uğrunda" sayt bə "Rakrus TV" əsasən ım məhkəmə iclasi barədə hartərəfinə məlumat dərc kardəşe. Bı iclasədə çe Lankoni rayoni Diqoh di bələdiyyə idarə Balaxan Huseynov və Vağif Bayramov nomədə 2 nəfər həmkari bənə sohidi ifadə doəşone. Təsdiğ kardəşone ki, Seyid Elmani bəvon çe Taleh Bağırzadə nıvıştə kitobçə doəşe, votəşe ki, Taleh bə hakimiyyət bome. Vəkil Akif Əliyevi bə Balaxan Huseynovi sual doəşe ki, "şımə 2012-2015-minə soronədə 44 qılə məhkəmə prosesonədə bənə şoydi iştirak kardəyone, çe huğuğ muhafizə orğanon həmkaryon ya ne? Huseyoviən cəvob doəşe ki, "ne həmkar nim, əmo keynə lazim beədə əvon ıştən mıni peydo kardedən!" Hakim Zeynal Ağayev ım duəvojə şohidi ıştəni biabur karde, həmən vəkilon və muttəhimon bey həniən sual doe vəy se ro əvış çe məhkəmə zaliku bekardə. İm bə etirazon səbəb bə. Vəkilon məhkəmə tərkibi əvəz karde barədə vəsadət ros kardışone, əmo məhkəmə kolleqiya tərəfo im vəsadət ğəbul bəni.

Hacı Zulfiğari votışe ki, "əmə jıqo bıhton votə şohidonmon vey vində. Xıdo həmişə çəvon cəzo doəşe. 2011-minə sori Əlihuseyn nominə qıley odəm bə Seyid Fəramizi əleyh duə ifadə doşe. Peşo maşini əv jeşe şikəst kardışe. Laçın nominə duəvojə şohidən ki, bə Fəramizi dim mandəbe, əvış doəbe qəte, bə çey səən həvo ome, səfi be, eqıne bə danqəxonə".

Bə çəmə dini alimon və imon əhli dim mandə ım odəmonən ıştə din və imon həvatəşone, çe xıdo noə royku bə kəno beşən. Çe cəmiyəti yodədə əvon nəsilbənəsil bənə xəyanətkar və beşərəfə odəmon bə xatır bomen, boştə vələd-evladon həmişə səkuə bəben.