Vəkili de Mevsum Səmədovi vindemon kardəşe
Vəkil Yalıçın İmanovi de Azərbaycani İslamə Partiya sədr, dini məhbus Mevsum Səmədovi Ğobustani zindonədə vindemon kardəşe. Mevsumi bə vəkili votəşe ki, iyulə manqi 21-ku əvşon bə Ğoustan ovoştoniə. Çə vaxtiku bey deştə ailə uzvon vindemoni, dəvon de telefoni qəp je və çəvonku peredaça se icazə dodənin. 6 kv.m-inə kameradə ey de co məhbusi oğətedən.
Ojə tualet kamera dıədey, jıqo antisanitariya şəraitinə kameradə jimon karde bo məhbusi əlovə qıley işqəncəy. Ovi təchizatən bərbad vəziyyətəde. Peşomə ov anədə lırdine ki, ey sətij nıkardə istifadə karde mumkun bedəni. Çəvon doə xorəkon bo insoni harde munasib ni.
Yalçın İmanovi bə "Azadlıq.info" məlumat doəşe ki, Ğobustani zindonədə mevcud vəziyyət bə Avropa Penitensiar Ğaydon ki, Az.R hokuməti bey ğol kəşəşe, tamam zidd qıley vəziyyətəde, hokuməti bəştə ehdə peqətə təhhudon cəvob dodəni.
Avropa Şura numayəndonən dəvardə rujonədə de Ğobustani zindoni şəraiti oşno bin, votışone ki, bə hiç qıley insoni jəqo şəraitədə oqəte rəvo zınedənin. Im zindoni təmom ləğv karde lozime.
Mısılmonon İbemonə hərəkati uzv Əhsən Nurullazadə, ki sentyabri 19-ədə dızdiəşonbe, vırəş məlum bıə. Vəkil Yalçın İmanovi bə Azadi Radio votəşe ki, Nurullazadə çe "Bandotdeli" tərəfo dızdiəşonebən və məhkəmə bey 10 sutkəninə zindonə cəzo bıriəşe. Səbəb ımi votedən ki, əv quya çe "Bandetotdeli" bina vəyku dəvardeədə dıjmonə sıxan bə zıvon vardəşe. Əlavən bıvotım ki, ım çe polison tərəfo bə cey munasibətədə 2-minə jıqo hərəkəte. Yanvari 24-ədən polisi bə Əhsəni im curə divon qətəşbe.
Polison sentyabri 21-minə ruji Bəhruz Ğuliyev nomədə qıley co dindarşən dızdiə. Əv şanqovoni çe koyku bə kə oqardeədə 4 nəfər mulki olətinə odəmi əvşon bə maşin dəfırsıniə bardəşone. Maşkinə ruji omən çey kədə ğeyri-ğanuniə axtarış bardəşone, çey komputer musadirə kardəşone. Bə ailə uzvon çe Bəhruzi tale barədə hiç qıley məlumat doəşon ni.
