Az.R-ədə Aşura əzadarəti mərasimon ımsorən de əzəməti dəvarde
Dı sor bə nav Əliyev hokuməti bə Nardarani və həmən respublika diqər reqioni dini fəalon divon qəte bəpeştə, Milli Məclisiən bə şiə mərasimon əleyh xeyli ğədəğə ğanunon ğəbul kardışe
Imsornə xalqi Məhərrəmə matəm mərasimədə iştiraki məhdud karde ro Boku, Nardaran, Lankon, Qəncə məntəğonədə xeyli polis ğıvvon çəm kardəşbe. "Vətən uğrunda" sayt sentyabri 30-minə ruji xəbə dodəbe ki, de Qəncə şəhəri İcra hakimiyyəti sərdari dəsturi Şah Abbas məçiti ətrof polison tərəfo bə muhasirə qətəşone, camaati əyo bo nomoj vote haştənin. Aşura şəviən camaat "Ya Huseyn, vay Huseyn" - vote-vote şəhəri "İmomzodə" ocəği ətrofədə polisi muğavimət sındınişone, dəşin əyo ıştə Aşura əzadarəti dəvunişone.
Polison Nardaran ğəsəbən bə muhasirə səşone, ətrofi sakinon bə çəvrey ocəği ziyarət karde imkan doəşonni. Lankonədə ıştə kədə təkyə noə odəmon dəstqir, ıştə əğılon bə məçit bardə valideynon de yolə məbləğə cərimə təhdid kardəşone.
Əmo anədə məhdudiyyət və təhdidon muğabilədə respublika sayton Boku, Nardaran, Biləçəri, Qəncə, Lankon və diqər məntəğon məçit və ziyarətqahonədə Aşura əzadərə tədbiron vey izdihamin və mehtəşəm dəvarde barədə xəbə doşone, bımi aid xeyli foto və video materialon bəştə əhandon edoştışone.
Azərbaycanıjə əhali Rusiya məkanədən bəştə dini adət-ənənon sadiğ mandin. Moskva, Sankt-Peterburğ, Yekaterinburğ, Ulyanovsk və həniən co məntəğondə jimon kardə Əhli Beyt (ə) tərəfdaron bə Aşura əzadarə məclison umjən bın, bə İmom Huseyn (ə) və bə Kərbəlo müsibəti diqər şəhidon ıştə məhəbbət və ehtiram izhar kardışone.
