Nardarani məhbusi kədə peqətə bıə pul kıve
Nardarani hadisə məhbus Elçin Ğasımov və 11 nəfər həmməsləkon muhakimədə vəkilon xeyli vəsadət bə nav doəşonbe. Noyabri 13-minə ruji iclasədə məhkəmə çəvon i ğism təmin kardəşe.
İttihami tərəf iddia kardedəbe ki, quya çe muttəhimonku "Taleh Bağırzadə muraciət" nominə kitobçə hestebən. Vəkilon həmonə kitobçə məhkəmədə tədğiğ karde, bey rəy nıvıştə bə Dini Təşkilaton dair Devlətə Komitə 2 nəfər həmkari məhkəmədə parseş karde, 2015-minə sori 5 noyabr Sabunçi Polis Şebə vədə dəvardə aksiya video kəşemoni bə məhkəmə təğdim karde vəsadəton təmin bıən. Hakimi əmandənə vəsadəton rədd kardəşe. Çe məhbus Elqun Axundovi kədə peqətə bıə 20 həzo mənot puli tale muəyyən karde ro mustəntiği bə məhkəmə cəlb karde barədə vəsadəti dair hakimi votəşe ki, ayəndə məhkəmə iclas ki, noyabri 17-minə ruji dəbəvarde, bəvədə ımi muzakirə bəkarden.
Hacı Zulfiğar Mikayılzadə və çey həmməsləkon məhkəmən dəvom kardəşe. Məhbus Seyid Elman Ağazadə bə məhkəmə ıştə orəxnə votemonədə ittihamon rədd kardəşe, votəşe ki, əvon soxtə, şər və bıhtonono ibarəte. Çey, həmən diqər məhbuson dəstqir karde əsas səbəb ıme ki, Lankonədə və məmləkəti diğər məntəğonədə Aşura mərasimi şe-şe izdihamin dəvarde hokumətış torsonie, çimi vəy se ro Nardaranədə jıqo qıley fitnəş təşkil karde.
Məhkəmə niyabri 27-ədə dəvom kardənine. Əmandənə 2 nəfər məhbus bə məhkəmə ıştə orəxnə sıxanon bəvoten.
