Nardarani faciə 2-minə sorəqardış
2 sor bə nav Nardaranədə məhərrəmə manqi Ərbəini ərəfədə Boku polis ğıvvon bə çivrey dindaron səpe nomoji vaxti qıley ğəfil hucum təşkil kardışe. Im həmlə nəticədə 6 nəfər həlok bıe. Respublika co məntəğonədən dəvom kardə repressyia nəticədə tosə 100 nəfər dini fəal bə zindon dənoşone.
De ım faciə sorəqardışi əlağədar Mısılmonon İbemonə Hərəkati sədr Taleh Bağırzadə çe zindono bəştə həmməsləkon və Respublika cəmiyyəti muraciət vığandəşe, votəşe ki, 26 noyabri ruj çəmə çe rejimi səpe mənəvi ğələbə, hakimiyyəti isə xalqi vədə ıştəni ifşa kardə ruje. Xalq bəpe bızıno ki, əmə ıştə mubarisəku onıbəkəriemon, hiç qıley təhdid və tars əməni çəmə həxə royku qordınie nibəzıne. Taleh vəkil Yalçın İmanovi çe Vəkilon Kolleqiyaku xaric karde barədən votəşe ki, əv çəmə vəkil, həmən çəmə dust bıe. Çey nom bə Azərbaycani huğuğ-mudafiə tarix de zəri nıvışte layiğ qıley şəxsiyyəte.
Abbas Huseynovən bə Rakurs TV bı məzmunədə muraciət vığandəşe. "Azadlıq.info" ım muraciəti həxədə nıvıştedə ki, beqınoə odəmon kıştə, bəvon işqəncə doə hokumət bəştə şəhrıvandon ıştə deşmenə munasibət numayiş kardışe. Vəomə nəslon Nardarani hadisə qınokaron həmişə de əbədi nifrəti bə yod bəvarden. Isətən dəvom kardə məhkəmə proseson çəmə hiç qıley qıno nıbe, Nardarani hadisə çe hokuməti təşkil kardə qıley fitnə be subut kardışe. Əmə təmom əminimon ki, tarix, həmən cəmiyyət ım hadisədə çe har kəsi layığinə ğıyməti bədo.
