Pars Today

İroni Yolə Rəhbər votışone: ətomiyə təvafuğədə bə xarıci kişvəron xatircəm mande nəticə vindımone iyən hiç foydə nıbardımone.

İroni Yolə Rəhbər Həzrəte Ayətullah Xamenei zinə Təbriz şəhri inğilabiyə cəmaəti vindemonədə əlovəşon kardən: de xoşbəxtiyəti ətomiyə təvafuği barde İroni rəsmi şəxson rəftor çoke ijən İroni xarıci vəziri vindımon ki bəbe çəyku ğədrdonti kəmon vey çok iyən zumande ki bəbe dəvom peydo bıkə boçi ki ətomiyə təvafuğədə Amerkə xəbisə məğsəd ijən Avropa zəifə və 2 dimə siyasəton hejo mışohidə bıdə.

İroni Yolə Rəhbər həmonə deşmənonku tənğidış kardə ki i tərəf deşməntion sayədə bəşəriyəti təhdid kardən və co tərəf İroni rəketiyə ğudrəti vədə mane bıdən ijən əlovəşon kardən ki ım məsələ bə jıqonə kişvəron çı dəxlış heste? Şımə İroni be siloh iyən be rəket karde sayədə zılm və sitəmi dəvom doero cəhd kardən.

Ə Həzrət əlovəşon kardən: çəmə vindımonədə cəmi kışte və ətomiyə silahon soxte hərome əmmo har şey ki lozim bıbu de zumandəti bəsoxtemon.

Həzrəte Ayətullah Xamenei iğtisodiyə mıvzoon vey muhimm iyən bə millət və daxıli zərfiyəton əsos hərəkət karde zınəşon bən və votışone: mığovimətiyə iğtisodi məno kişvəri daxilədə məhdud mande ni bəlkəm bə daxıli estedadon əsos xarıcionku istifodə karde heste.

İroni Yolə Rəhbər bə ımsornə sori Bəhmənə manqi 22 ruji yolə aksiyadə cəmiyəti huzur işorəşon kardən və votışone: bə İroni inğilabi mudafiə kardero əv həm 40 sor çəy səbarzəti bəpeştə jıqonə huzur iyən hərorətinə iştirok bənə mocizəy və dınyo hiç qılə inğilabonədə stajış ni.

İroni Yolə Rəhbər bə İroni islamiyə inğilabi dərkiku xaric bıə əzəmət və boodon işorəşon kardən ijən ım inğilabi muhimmə xidməton və roli çı deşmənon bevəcə təbliğon barde votışone: islamiyə inğilabi vey muhimmə ko tağut nizomi bə demokratik nizom əvəz karde heste yəni qıləy nizom ki çəy həmmə vırəon və çionədə millət əsl və sutune.

İroni islamiyə inğilabi Lider İronədə lider, prezident və co rəsmi şəxson de milləti sərost və ğeyri mıstəğim sədo və vindımoni vıjniye çı dini demokratik nizomi i baxş zınəşon bən iyən votışone: demokratik nizom yəni jimoni həmmə koonədə milləti bənə sədo sohib iyən tədbiri xambuz zıne və ım yəni İroni inğilabi bə nav çand ğərni mıddətdə bıə tağut və sultə nizomədə milləti bə təcrid mande əks sistem ki həğiğətən cəmaəti vindımon hiç muhimm nıbe.

Ə Həzrət çı İroni milləti ısətnə ğeyrət, əzəmət və ğəhremanti həminə inğilabi vey muhimmə rol zınəşon bən və votışone: ımruj çı məntəğə qıləy kişvəron har ruj çand milyon barol nati həvote sayədə həm qıləy bə dumo mandə kişvəre ki əyo çı milləti iradəku hiç xəbə ni əmmo dini demokratik sistemi sayədə İroni millət vey bəpe iyən inğilabədə bıə səbarzə cəmaətonin.