Zərif: Avropə İ Bemon de İron həmkarion dəvomiyətiro bəbe praktiki hərəkəton əncum bıdə.

İroni xarıcə vəzir votışe: Avropa İ Bemon de İron iğtisodi həmkarion dəvomiyətiro bəbe praktiki hərəkəton çimiku vey əncum bıdə və İronədə investisiya miğdori ziyod bıkə.

Bə xarıci vəzarətxanə mediyaon diplomatiyə idarə raporti əsos, İroni xarıci vəzir Muhəmməd Cəvad Zərif zinə ruji Tehronədə de Avropa İ Bemoni enerji komissar Miqel Aryas Kanete didor karde təkidış kardə: bo ətomiyə təvafuği icra kardeyro Avropa İ Bemoni təəhudon de ım təşkilati yolə şirkəton de İron həmkarionku ehtımoliyə imtino karde mıtobığ ni.

İroni xarıci vəzir əlovəş kardə: ətomiyə təvafuğiku Amerkə xaric bey bə peştə, bo ım muğavilə nəticəon hifz kardeyro umumiyə fikon intizoron çı Avropa İ Bemoniku vey ziyod bıə.

Avropa İ Bemoni enerji komissar həm bə ətomiyə təvafuğiku Amerkə xaric bey işorəş kardə və votışe: bo ətomiyə təvafuği nətinəon hifz kardeyro Avropavıjə kişvəron ittifoğ vey əhəmiyyətış pəydo kardəy və ım ittifoği siyasiyə iradəon ətomiyə təvafuği icra karde iyən de İron Avropavıjə şirkəton iyən kompaniaon həmkarion dəvom doe heste.

Kanete əlovəş kardə: ətomiyə təvafuğiku Amerkə xarıc bey bo Avropa vey mışkolon icod kardə əmmo Avropa İ Bəmoni mesaj ətomiyə təvafuği hifz və icra karde sayədə  de İroni həmkarion dəvom doe heste.

Amerkə prezident Donald Trupi  Mayə manqi 8-nə ruji ğəroli bəpeştə ki əmələn ım kişvəri ətomiyə təvafuğiku xarıc bey bois bıə, İron və Avropa İ Bemon de Çin və Rusiyə bə ico Mayə manqi 15 və 16ədə ətomiyə təvafuği ijən be Amerkə dəvom doe xoto muzakirəon Brusselədə bino kardən.

Im muzakiron ətomiyə təvafuği mıştərəkə komissiya, koşınasi iyən siyasi səthədə detosə Mayə manqi 26 Vyanaədə dəvomış bəbe.