Ruhani: Xəzə dıyo huğuği statusi muğavilə imzo bey, bo mıştərəkə həmkarion təğviyət karde qıləy muhimmə hərəkət be.
İroni prezident, Xəzə dıyo huğuği statusi muğavilə imzo bey, ım dıyo saheliyə kişvəron miyono mıştərəkə həmkarion təğviyət karde qıləy muhimmə hərəkət zınəş be.
Həsən Ruhani zinə Ğəzaxıstonədə Xəzə dıyo saheliyə kişvəron ali rəsmi şəxson iclosədə, de işorə bə ım ki ımruj ruji Xəzə dıyo, bənə vey muhimm və stratejik məntəğə, dıvləton iyən milləton miyono dustiyə iyən mıştərəkə həmkarion mehvəre, votışe: ısət sulhi qarantiya, stabiləti, dustiyəti, çokə hamsoyəti və inkişofi sahəonədə ım məntəğə bənə qıləy mıvəffəğə olqo əvəz bəy ijən ım iclos məntəğədə bo mıştərəkə əloğəon co qılə ğədəm be ki bəpe de co hərəkəton zumand iyən inkişofin bebu.
İroni prezident əlovəş karde: de Xəzə dıyo huğuğiyə statusi muğavilə imzo bey, vey muhimmə qədəm peqətə bəy əmmo hələ muhimmə mıvzoon mandəy ki bo oxonə muzakirəon iyən muğaviləon məxsusən çı dıyo sərhəd iyən hıdudi məhdud və mıəyyən karde həmçınin çoknə dıyo ibtido xətton kəşe xoto bəpe idomə peydo bıkə.
Ruhani votışe: dıyo ehtiyatonku mıştərik forma istifodə karde yaxot i tərəfiyə istihsoliku bə kəno mande karde bəzne bənə yeqanə roy Xəzə dıyo marzon mıəyyən nıbıə məntəğədə ehtimoliyə ixtilofon vədə mane bıbu.
İroni prezident ijən de işorə bə İroni şimal və cənubədə bıə dıyo dastrəsətion, dıyo nəğliyat və ticarəti sahədə bə İroni zərfiyəton iyən zumandə komilə hozzıəti təkidış karde.
Əv həmçınin bə Xəzə dıyo huğuği statusi muğavilə və çand tərəfiyə sazişon çok icra karde iyən bə əvon daimə nəzorəti zərroriyət təkidış karde.
Ğəzaxıstoni Oktao bəndərədə, Xəzə dıyo 5 qılə saheliyə kişvəron yolon 5-minə iclosi de İron, Russiyə, Ğəzaxıston, Tırkmənəston və Azərbaycan Respublika prezidenton huzuri zinə bərpo bıə.
