Ğasımi:Avropa siyasət atom sazışi roədə İslamiyə Respublika faydon təmin karde cəhətdəy.

İroni xarici koon vəzorətxonə sıxanəvot,atom sazışiku Amerkə kəno mande bəpeştə islamiyə Respublika faydon təmin karde cəhətdə İron və Avropa siyasəton bə iyandı nez beku xəbəş do.

İroni xarici koon vəzorətxonə sıxanəvot Bəhram Ğasımi zinə atom sazışi həxədə İron və Avropa miyonədə  həmkarətion dəvom doeyu bıə roziyətion barədə əlavəş karde xəyli şe-ome və veyə muzakiron mincumlə Niyuyurki iclosədə ironi xarici koon vəziri de 4+1 qrupi bə ğərol omimon ki həmkarətion tojə şərayetdə dəvom pəydo bıkə.

İroni xarici koon vəzorətxonə sıxanəvoti əlavəş karde Amerkə de İron ixtisadiyə həmkarəti kardə məmləkəton zid təziğon və məxsusə şərayeton xoto iyən ım roədə  veyə vaxt iyən xərcon sərf karde xoto İron və Avropa itifaği muzakiron və təşkil bə plan milliyə məsləhəton xoto iyən ə deşmenon xoto ki ım əlağon xərob karde domoədən ım məsələ oşko bə ni və nibəbe.

Ğasımi eyne holədə de Avropa tojə natə roziyəti həxədə İroni xarici koon vəzir Muhəmməd Cəvad Zərifı sıxanonku işarəş karde  və votışe: de ğətiyəti xorəki vədə nat ya bənə jıqo sıxanon səhih nin və İron atom sazışi roədə de Avropa ,Çin və Rusiyə həmkarəti karde domoədəy.

İroni xarici koon vəzorətxonə sıxanəvot,zərifı tuvitı həxədə ki elanış kardə əqər Avropa itifaği vıjniyə ro bə kar nıvo,İslamiyə Respublika,atom sazışiku xaric bəbe jıqo votışe: əqər Avropa itifağ iyən coqlə şərikon,ironi ehtiyocon vədə lozim bə qaranton təğdim nıkə,ım məsələ  bəzne İslamiyə Respublika ğərolədə təsir ənə bıbo və İron ə ro ki bə məmləkəti məsləhəte ə roədə hərəkət bəkay.

Ğasımi ironi beynəlxalğə kanali jurnalisti suali cəvobədə ,Rusiyə xarici koon vəzir  Lavrovi sıxanon həxədə ki İ bə milləton təşkilati sər asambleya iclosi bəpeştə qıləy xəbəriyə iclosədə İron və sionist rejimi məsəlon həxədə çı məmləkəti bə arə dəşeku xəbəş doə be votışe: həmmə zındən ki israilı ğeyre ğanoniyə rejimi həxədə İslamiyə Respublika siyasət çokonəy,İron sionist rejimi bə rəsmiyət zındə ni və heç vaxti ım məsələdə coqlə tərəfi bə arə dəşe ğəbul nibəkay.

İroni xarici koon vəzorətxonə sıxanəvot ıştə sıxanon dəvomədə ijən əhvazı terroristiyə hadisəş məhkum karde və votışe: terarizmı bəhs bə qıləy beynəlxalğə icma və hərəkət ehtiyociş heste və həmmə məmləkəton bəpe de ciddiyət ım notəmizə hərəkətdə mubarizə bıkən.

Ğasımi omidvarətiş karde natə dollaron iyən bəzi məmləkəton siyasi və ixtisadiyə əlağon de terroristiyə mərkəzon və jıqo fikon icod əkə mərkəzon beynəlxalğə ictimaiyəti səviyədə de terarizm ciddiyə mubarizədə mane icod nıkə.