Qeneral Pakpur: terroriston niyyət Sistan və Bəluçıstani vəhdəti məhv kardeye.

İslamiyə İnğilabi Sepahe Pasdaran Zəminiyə Ğıvvon kamandan votışe: Mircavə Lulkedan məntəğədə sərhəddiyə əsqəron dızdiye hadisə hədəf iyən məğsəd, Sistan və Bəluçıstan cəmaəti vəhdəti məhv kardeye.

Bə İrna raporti əsos, qeneral Muhəmməde Pakpur İroni cənub şərğ Sistan və Bəluçestanədə zinə şəv bəyonış karde ki deşmənon hiç vaxt nibəznın İroni Sepah və toyfəon miyono rabitə iyən əloğəon xərob bıkən iyən əlovəş do: Mircavə məntəğə sərhəddiyə əsqəron dızdiye tojə hodisədə terroriston co qılə niyyət ım be ki toyfəon iğtidor və çəvon məsuliyətin bey məhv bıkən. 

İslamiyə İnğilabi Sepahe Pasdarani Zəminiyə Ğıvvon kamandan bə İron və məntəğə milləton nifrəti bois bıə ğeyri insoniyə hərəkətoni ki terroriston de nıfuziyə amilon iyən xiyonətkoron vositə əncom doəşone təkid iyən izhorış kardə: sepahe pasdaran ıştə həmmə zərfiyətonku bo sərhəddiyə dızdiyə bıə əsqəron ozod karde istifodə bəkay. 

Tojədən İslamiyə İnğilabi Sepahe Pasdarani Zəminiyə Ğıvvon ğərorqo qıləy bəyoniyə elanış kardə: terroriston əməliyotədə deşənbə şəvi vaxt i dastə bumiyə bəsijion və sərhədd məmuron ki Mircave sərhəddədə bə məmuriyət əncom doe məşğul bin, de anti inğilab qrupon nıfuz iyən daxıli xiyonətkoron həmkari dızdiyə bıən. 

Sepahe pasdarani zəminiyə ğıvvon Ğuds ğərorqo umumiyə rabitəon təkidış kardə: terroriston və deşməni nıfuzi amilon təğib kardey əməliyot iyən dızdiyə bıə əsqəron ozod karde xoto lozimə cəhdon de ciddiyəti İroni əmniyyəti və mudafiə ğıvvon tərəfo əncom bey holədəy.