Əmələdə Avropa bə dumo mande ğəbul bənin ni.
Beynəl xalğiyə sahədə İroni islamiyə şura məclesi məxsusə mışovir Amerkə i tərəfiyə siyasəton barədə Avropa siyasət və mediya mıvğeiyət qəte çok zınəş be əmmo əmələdə Avropa bə dumo mande tənğidış karde.
Husein Əmir Əbdullahiyan Tehronədə de Avropa əmniyyət koonədə lider kanali icraiyə mudir Tarca Aneli Keronberi vindemonədə əlovəş karde: Avropa mısbət vədəon ki SPV sistemi barədə elan bəy bəpe de əməli hərəkəton bə i co bıbu.
Əmir Əbdullahiyan bə Avropaədə mınofiğin terroristiyə qrupi fəaliyət ki hətto bə Avropa zid əncom bey holədə işorəş karde və votışe: əvon İron və Avropa miyono rabitəon bə yandej pidəşone.
Tarca Aneli Keronberi həm ətomiyə sazışi barədə votışe: əmə ım sazışi oqəte fikədəmon, ım mığovilədə qırd mıştərəkə mənafəmon heste.
Əv bə Avropa təəhudaton həm jıqo cəvobış do ki əqə çı ım vədəon tikəy bə dumo mandəy əmmo icra bey holədəy.
Tarca Aneli Keronberi əlovəş karde: ətomiyə sazış bo siyasi bohranon həl karde qıləy çokə olqo be və İron çı Miyonə Şərği be siloh karde bənə i minə kişvəri vey cəhd kardedə.
